Politike 2 Tetor 2023, 13:00

“KFOR të marrë nën kontroll Veriun”/ Kreshnik Çollaku dërgon në Kuvend kërkesë për interpelancë me Ramën

Shkruar nga Pamfleti

“KFOR të marrë nën kontroll Veriun”/ Kreshnik

Deputeti i Partisë Demokratike Kreshnik Çollaku ka dërguar kërkesë për interpelancë në Kuvend, duke kërkuar që kryeministri Rama të japë shpjegime në lidhje me qëndrimet e tij ndaj sulmit të Kosovës. Ai e quan të çuditshme deklaratën e tij, i cili tha se veriun duhet ta marrë nën kontroll KFOR. 

Çollaku shkruan gjithashtu se kërkesa e tij cënon sovranitetin e Kosovës mbi atë pjesë të territorit të saj, si dhe kompromenton autoritetin e Policisë së Kosovës dhe Forcave të Sigurisë së Kosovës. Gjithashhtu, kërkesa e Kryeministrit Rama injoron faktin se NATO e KFOR janë në Kosovë për të mbështetur pavarësinë e sovranitetin e saj dhe jo për ta dëmtuar apo asgjësuar atë.

Kërkesa e Kreshnik Çollakut:

E Nderuar Znj. Nikolla.

Në datë 24 shtator 2023 në orët e para të mëngjesit një grup terrorist, në formacion dhe i uniformuar ushtarakisht, në Zveçan pranë Manastirit të Banjskës, sulmoi një patrulle policore të policisë së Kosovës duke vrarë një oficer policie, rreshterin Afrim Bunjaku, dhe plagosur dy të tjerë.

Pas përgjigjes së policisë së Kosovës grupi strehohet në Manastirin e Zveçanit dhe prej aty pozicionohet në pozicion luftimi së bashku me një arsenal të konsiderueshëm armatimi, përfshirë mjete motorike e autoblinda ushtarake.

Pas ndërhyrjes së nivelit të lartë profesional dhe në koordinim me KFOR dhe Eulex, policia e Kosovës asgjësoi disa anëtarë të grupit terrorist, arrestoi disa të tjerë dhe detyroi pjesën tjetër të kthehet duke kaluar kufirin e duke u futur në territorin e Republikës së Serbisë.

Me hyrjen dhe kontrollet e policisë së Kosovës në Manastirin e Zveçanit, u zbulua një arsenal i jashtëzakonshëm armatimi të nivelit të lartë, sipas referimit nga Policia e Kosovës, me vlerë prej afro 5 milion euro.

Prej një jave Ministria e Brendshme e Kosovës ka bërë publike, bazuar në prova të pakundërshtueshme, faktin se sulmi i komandos mbi Policinë e Kosovës në datë 24 shtator në Zveçan, nuk ishte një incident i shkëputur apo një akt terrorist i kufizuar, por pjesë e një strategjie të qartë për të zgjeruar aktivitetin diversionist në Zveçan e në komuna të tjera me synim aneksimin e një pjese të territorit të Kosovës të përbërë nga katër Komunat Veriore të Mitrovicës.

Jo vetëm pjesëmarrja e një eksponenti të larte politik, numrit dy të Listës Serbe, Radojçiç, në komandën e këtij grupi, as vetëm shpallja e zisë kombëtare nga Republika e Serbisë në nderim të terroristëve të asgjësuar, por dhe materiale e fakte, pamje filmike e dokumenta mbi stërvitjen, pajisjen me armatim, mbështetjen logjistike dhe politike, tregojnë qarte se pas këtij akti qëndron Beogradi.

Aneksimi de facto me dhunë i një pjese të territorit të Republikës së Kosovës, me proxi apo duke detyruar nën dhunë pjesë të popullatës apo institucione fetare në Veri të Kosovës, është një akt agresioni me pasoja shumë të rënda për paqen e stabilitetin e rajonit.

Në mënyrë të njëzëshme ishte i menjëhershëm reagimi ndërkombëtar në dënim të këtij akti, dhe në kërkesën për mbajtjen e përgjegjësisë së autoreve dhe nxitësve të kësaj ngjarjeje.

Klasa politike në Kosovë reagoi e unifikuar, sikurse edhe mbarë opinioni publik në hapësirën shqiptare në Ballkan.

Nga qeveria shqiptare reagimet erdhën kontradiktore.

Ndërsa nga një anë dënohej akti, nga ana tjetër hezitohej të thirrej në përgjegjësi për këtë akt Beogradi dhe Presidenti Vuçiç. Postimet në rrjetet sociale të Kryeministrit, në të cilat cilësohej ngjarja e ndodhur si një “tragjedi” krijuar konfuzion në lidhje me qëndrimin e parë të Kreut të Qeverisë në lidhje me ngjarjen. Sikur kjo të mos mjaftonte në konferencën për shtyp Kryeministri Rama, i fundit nga radha i drejtuesve politik të shumë vendeve fqinje dhe partnere, me se fundmi deklaroi përgjegjësinë e Serbisë mbi ngjarjen.

Në të njëjtën konferencë Kryeministri, në mënyrë të çuditshme dhe të papranueshme kërkoi “…marrjen e Veriut të Kosovës nën kontroll nga KFOR”. Të njëjtën kërkesë ditë më parë e kishte bërë po ashtu në një konferencë për shtyp presidenti serb Vuçiç.

Kërkesa u refuzua publikisht dhe unanimisht nga institucionet e Kosovës, në të gjitha nivelet dhe u deklarua si e pakonsultuar me Qeverinë e Kosovës, madje një propozim që cënon interesat dhe sovranitetin e Kosovës.

Kërkesa për marrje nën kontroll nga KFOR të veriut të Kosovës është një shpallje de facto e protektoratit ndërkombëtar mbi një pjesë të territorit të shtetit sovran të Kosovës. Kërkesa cënon sovranitetin e Kosovës mbi atë pjesë të territorit të saj, si dhe kompromenton autoritetin e Policisë së Kosovës dhe Forcave të Sigurisë së Kosovës. Kërkesa injoron thelbin e prezencës dhe mandatit të KFOR, si dhe raportin e saj me Policinë e institucionet e Republikës së Kosovës. Kërkesa e Kryeministrit Rama injoron faktin se NATO e KFOR janë në Kosovë për të mbështetur pavarësinë e sovranitetin e saj dhe jo për ta dëmtuar apo asgjësuar atë.

Bazuar në sa më sipër me qëllim dhënien e informacioneve dhe shpjegimeve lidhur me qëndimin zyrtar të qeverisë së Republikës së Shqipërisë, hapat që parashikohen të ndërmerren dhe qëndrimet në raport me zhvillimet e pritshme në marrëdhëniet ndërshtetërore në Ballkan, në cilësinë e deputetit të Kuvendit të Republikës së Shqipërisë, në mbështetje të nenit 80, pika 1 të Kushtetutës dhe të nenit 96 pika 1 dhe 2 të Rregullores së Kuvendit, kërkoj zhvillimin e një interpelancë me Kryeministrin Edi Rama.

kreshnik collaku kerkese kuvend rama