FLASH
Shkruar nga Pamfleti
Ish-deputetja Majlinda Bregu është shfaqur në Kuvendin e Shqipërisë në kushtet kur Partia Demokratike, në të cilën ndërtoi karrierën, është më e përçarë se kurrë.
Bregu rikthehet si e ftuar në Këshillin e Integrimit si drejtuese e Këshillit të Bashkëpunimit Rajonal.
Në një prononcim për abcnews, Bregu ka rrëfyer se çfarë ndjesie ka sot ajo për situatën në PD.
“Nuk e di nëse jam e habitur, jam e tronditur apo jam e përgatitur? Unë do të them se isha e përgatitur, sepse të paktën në momentin ku jam larguar unë nga PD, fatkeqësisht leximi se çfarë do të vinte më pas ishte shumë i qartë dhe ju e mbani mend shumë mirë. Kemi qenë bashkë në atë kohë, që frika më e madhe ishte se partia do të kalonte në proces vetëshkatërrimi. Gjë që ka ndodhur sot, kështuqë, një ditë, që mali sapo mbarset “pjell një mi” apo në ditën tjetër duket sikur ka një ngjyrim më të madh, në fund të ditës, rezultati fatkeqësisht është ky që shihni të gjithë”, u shpreh Bregu.
Ish-deputetja ka pranuar se parashikimi i saj nuk ka shkuar deri aty sa të mendonte që Partia që solli pluralizmin në vend, do të arrinte në ditën që të regjistronte vetëm 11 kandidatë për 14 majin.
“Deri diku besoja se ajo le të themi, ose ai shembull i ke i dhënë, kur Lulzim Basha mori një parti dhuratë dhe nuk diti të menaxhonte, përveçse e shkatërroi dhe nuk diti ta menaxhonte, do ndalej me të, por partia dhuratë e Lulzim Bashës i shkoi Enkelejd Alibeajt dhe ja ku jemi”, tha ish-deputetja.
Ish-ministrja e integrimit, nuk mban anë në debatin mes dy kampeve, por sheh një dritë në fund të tunelit edhe pse rruga drejt ripërtëritjes është e dhimbshme.
“Nuk të bën kryetar logo sikurse nuk të bën as vetëm vula por, ky nuk është problemi për të gjetur fajtorin sot, ky nuk është problemi që ti nuk je i zoti, problemet janë aq të mëdha në PD, të strukturuara vit pas viti sa sot është tërësisht e vështirë dhe me sa duket fatkeqësisht duhet të bëhet akoma më keq për t’u bërë mirë”, tregoi ajo.
Kujtojmë se pas një qasjeje kritike që Majlinda Bregu i bëri lidershpit të Lulzim Bashës në krye të PD, ky i fundit u hakmor duke e lënë jashtë listës ish-deputeten për në parlament në vitin 2017. Pas kësaj, ajo u largua në Sarajevë, ku mori drejtimin e një prej strukturave më të mëdha të Ballkanit, Këshillit të Bashkëpunimit Rajonal.
Lini një Përgjigje