FLASH
Shkruar nga Pamfleti
Rrjeti ndërkombëtar “Euronews” i ka kushtuar një artikull Fredi Belerit dhe Ilaria Salis, dy eurodeputetët e rinj që janë në masë arresti. Në artikull ballafaqohen të dyja rastet, ku teksa Ilaria Salis duket se do fitojë lirinë, Beleri duhet të gëzojë mandatin pasi të kryejë dënimin.
Lista e 720 eurodeputetëve të zgjedhur këtë javë përfshin dy emra, të cilët mund të gëzojnë më shumë se të tjerët, pasi ata janë aktualisht në paraburgim për aktivitet të dyshuar kriminal.
Ilaria Salis, e partisë së majtë italiane dhe Fredi Beleri, një kandidat i Demokracisë së Re greke, së shpejti do të shkojnë në Bruksel dhe Strasburg.
Të dy duket se janë një “gjemb në këmbë” për vendet ku u arrestuan, në Hungari dhe Shqipëri, të cilat përballen me pyetje lidhur me pavarësinë e gjyqësorit.
"Ne jemi shumë të lumtur”, tha Roberto, babai i Salis për "Euronews". "Shpresoj që ajo të jetë e lirë sa më shpejt të jetë e mundur."
Ilaria u arrestua në Hungari pak më shumë se një vit më parë dhe është ende në pritje të gjyqit, e akuzuar për sulm ndaj ekstremistëve neonazistë, akuza të cilat ajo i ka mohuar.
Pas suksesit në dy rajone italiane, ajo tani është vendosur të lirohet, sipas rregullave që u japin eurodeputetëve imunitet nga procedurat ligjore në shtetet e tjera anëtare të BE-së.
Në praktikë, dokumentet për të siguruar lirinë e saj mund të zgjasin katër deri në pesë javë dhe asaj mund t'i duhet kohë për t'u rikuperuar, tha babai i saj, duke rrezikuar potencialisht aftësinë e saj për të marrë pjesë në nisjen e sesionit të ri të PE.
Akuzat
Megjithëse ajo u lirua nga burgu dhe u vendosa në arrest shtëpiak më 23 maj, kushtet e saj kanë qenë shumë të vështira", shtoi babai i saj. Ai e sheh arrestimin e aktivistes si një “veprim tërësisht politik”.
Kjo akuzë për njëanshmëri gjyqësore pasqyrohet edhe për Belerin, një shtetas grek i dënuar për blerje votash, pasi u zgjodh kryebashkiak i Himarës, në jug të Shqipërisë.
"Është një arrestim politik ... nuk ka asnjë provë, asnjë provë për ndonjë krim", tha për "Euronews" Marin Suli, Sekretar i Përgjithshëm i OMONIA.
“Shteti ligjor nuk ekziston, është sundimi i Ramës”, shtoi Suli, duke iu referuar kryeministrit socialist të Shqipërisë.
Beleri nuk do të lirohet automatikisht, pasi Shqipëria është jashtë BE-së, por Suli shpreson se mund të fillojë të marrë pjesë në seanca, pasi i skadon dënimi dy-vjeçar në shtator.
Beleri i ka mohuar dhe apeluar akuzat – dhe Suli thotë se ata do ta çojnë çështjen në Gjykatën Evropiane të të Drejtave të Njeriut nëse është e nevojshme.
Bllokada greke
Kryeministri grek, Kyriakos Mitsotakis kishte kërcënuar se do të bllokonte bisedimet e Shqipërisë për t'u anëtarësuar në BE derisa çështja të zgjidhej, përpara se të shtonte Belerin në listën e tij të partisë Demokracia e Re.
Në një postim në Facebook të hënën, Beleri përshëndeti fitoren e tij si pjesë e "betejës për demokraci" dhe "vlerat evropiane".
“Drita gjithmonë fiton mbi errësirën ... fuqia e demokracisë mund të fshijë çdo grusht shteti,” tha ai. “Do të punoj shumë që të jem i dobishëm për partinë time, për Demokracinë e Re dhe mbi të gjitha për atdheun tonë”.
Rregullat e BE-së synojnë të mbrojnë eurodeputetët nga persekutimi politik – por ligjvënësit nuk janë plotësisht të imunizuar nga drejtësia.
Ata ende mund të arrestohen nëse kapen në flagrancë – siç ishte rasti i Eva Kailit, megjithëse ajo ka mohuar shkeljet në skandalin "Qatargate".
Parlamenti gjithashtu mund të pranojë të heqë imunitetin e një deputeti, siç ishte rasti me Ioannis Lagos të Greqisë, pasi partia e tij e ekstremit të djathtë Agimi i Artë u shpall organizatë kriminale.
Teknikisht, eurodeputetët mund të vazhdojnë të mbajnë postin e tyre edhe pas dënimit ose burgimit, por kryerja e punës nuk është gjithmonë e lehtë nga ana logjistike.
Ndërsa ishte në burg, Salisit iu lejua vetëm një orë intervista në muaj dhe nuk ishte në gjendje të kryente një fushatë konvencionale.
Pas zgjedhjeve, Beleri duhej të merrte pjesë në një takim të parë të eurodeputetëve të Demokracisë së Re përmes videokonferecës, pasi kishte marrë leje speciale nga SPAK. /Përshtati "Pamfleti" nga “Euronews”
Lini një Përgjigje