FLASH
Shkruar nga Pamfleti
Fituesja e edicionit të tretë të “Big Brother VIP Albania”, Egla Ceno, është shqetësuar shumë për sigurinë e makinës së saj.
Përmes një reagimi publik në rrjetet sociale, aktorja ka bërë të ditur se automjeti i saj është dëmtuar gjatë natës, konkretisht i janë thyer fshirëset e makinës. Sipas deklaratës së saj, kjo ngjarje nuk ka ndodhur papritur, por vjen pas disa ditësh shqetësimesh të vazhdueshme, ku dikush ka ndërhyrë në mënyrë të përsëritur te makina e saj, duke lëvizur apo dëmtuar fshirëset.
Në reagimin e saj, Ceno i drejtohet drejtpërdrejt personit përgjegjës, duke e paralajmëruar se zona ku ka ndodhur incidenti është e monitoruar nga kamera sigurie. Ajo thekson se ekzistojnë pamje që mund të ndihmojnë në identifikimin e autorit dhe se nuk do të hezitojë të ndjekë rrugën ligjore.
“Një paralajmërim për personin që ka disa ditë që luan me fshirëset e makinës time poshtë shtëpisë dhe që sonte e kishte thyer… Nesër patjetër do bëj një kallëzim në polici që të tuteloj veten,” – shprehet ajo ndër të tjera.
Aktorja thekson se ka vite që jeton në të njëjtën lagje dhe se gjithmonë ka ruajtur marrëdhënie të mira me komunitetin përreth, duke respektuar dhe u respektuar nga të tjerët. Pikërisht për këtë arsye, ajo e konsideron këtë incident si të pazakontë dhe shqetësues.
Një element që e bën situatën edhe më të ndjeshme është fakti se makina për të nuk është thjesht një mjet transporti, por një domosdoshmëri e përditshme. Ceno tregon se kujdeset për nënën e saj të paralizuar, të cilën duhet ta shoqërojë rregullisht për kontrolle mjekësore, çka e bën dëmtimin e automjetit një problem serioz në jetën e saj të përditshme.
Në të njëjtën kohë, ajo lë të kuptohet se mund të ketë një ide mbi atë që ka ndodhur, por zgjedh të mos japë detaje, duke ia lënë çështjen në dorë autoriteteve përkatëse. Megjithatë, reagimi i saj përmban edhe tone të forta paralajmëruese, duke treguar vendosmërinë për të mos toleruar situata të tilla dhe për të mbrojtur veten dhe familjen e saj.
“Unë nuk jam njeri pa njeri, mos më prek damarin e Cenos se nuk të lë “hekur” që ke ngulur në asfalt, pa lëvizur”, shkruan ajo, duke nënkuptuar se e di kush fshihet pas dëmtimit të automjetit.
Lini një Përgjigje