Bota 9 Dhjetor 2023, 10:14

Pas vetos së SHBA-s, Irani paralajmëron shpërthim të luftës në rajon

Shkruar nga Pamfleti

Pas vetos së SHBA-s, Irani paralajmëron shpërthim të

Irani paralajmëroi sot për mundësinë e përhapjes së konfliktit në Lindjen e Mesme nëse Shtetet e Bashkuara vazhdojnë të mbështesin Izraelin në luftën e tij kundër Hamasit në Gaza.

“Për sa kohë që Amerika mbështet krimet e regjimit zionist dhe vazhdimin e luftës, ekziston mundësia e një shpërthimi të pakontrolluar të konfliktit në rajon”, tha ministri i jashtëm iranian Hossein Amir-Abdollahian gjatë një bisedë telefonike me Sekretarin e Përgjithshëm të OKB-së Antonio Guterres.

Reagimi vjen pasi SHBA të premten, vuri veton ndaj një rezolute të Këshillit të Sigurimit që bën thirrje për një armëpushim të menjëhershëm humanitar në Gaza.

Legjislacioni, i cili mori 13 vota pro, një kundër (SHBA) dhe një abstenim (MB) u hartua nga Emiratet e Bashkuara Arabe pas thirrjes së paprecedentë të Antonio Guterres ndaj nenit 99 të Kartës së OKB-së, i cili e lejon atë të tërheqë vëmendjen e Këshillit të Sigurimit për një çështje e cila mund të rrezikojë ruajtjen e paqes ndërkombëtare dhe sigurisë ndërkombëtare.

"Përdorimi i nenit 99 është një veprim i guximshëm nga ana juaj për të ruajtur paqen dhe mbështetet nga opinioni publik botëror," i tha Amir-Abdollahian, Guterres.

Për ministrin iranian, pretendimi i izraelitëve se Hamasi është ai që shkeli armëpushimin që përfundoi më 1 dhjetor, është krejtësisht i rremë.

irani shba veto armëpushim hamas gaza izrael palestinë