FLASH
Shkruar nga Pamfleti
Parashikohen fusha të reja, stadium kombëtar dhe programe për të rinjtë
FIFA dhe Bordi i Paqes kanë formalizuar një marrëveshje bashkëpunimi që synon të kanalizojë investime në zonat e prekura nga konflikti, duke përdorur futbollin si instrument zhvillimi. Presidenti amerikan Donald Trump deklaroi se në kuadër të kësaj nisme, FIFA do të mbledhë 75 milionë dollarë për projekte në Gaza.
Bordi i Paqes, i krijuar gjatë presidencës së Trump, zhvilloi takimin e tij të parë me fokus fondin e rindërtimit të Gazës. Plani lidhet me rikuperimin e territorit pas çarmatimit të Hamasit. Çarmatimi i militantëve, tërheqja e trupave izraelite, përcaktimi i vlerës së fondit dhe administrimi i ndihmës humanitare mbeten elementë që pritet të ndikojnë në zbatimin e projektit.
Marrëveshja me FIFA-n përfshin ndërtimin e 50 mini-fushave pranë shkollave dhe zonave të banuara, pesë fushave me përmasa të plota në distrikte të ndryshme, një akademie teknologjike të FIFA-s dhe një stadiumi kombëtar me kapacitet 20 mijë vende.
“FIFA dhe Bordi i Paqes kanë nënshkruar një marrëveshje partneriteti të rëndësishme që do të nxisë investimet në futboll me qëllim të mbështetjes së procesit të rimëkëmbjes në zonat pas konfliktit,” tha presidenti i FIFA-s, Gianni Infantino, në një deklaratë.
Ai shtoi se “së bashku me mbështetjen e Bordit të Paqes, FIFA do të nxisë këtë partneritet, i cili është ndërtuar për të sjellë ndikim në çdo fazë”.
Programi parashikon gjithashtu hapjen e vendeve të punës, përfshirjen e të rinjve në aktivitete sportive, organizimin e ligave për djem dhe vajza, si dhe mbështetjen e angazhimit komunitar dhe të aktiviteteve tregtare lokale.
Lini një Përgjigje