FLASH
Shkruar nga Pamfleti
Rubin Kazan ka zyrtarizuar transferimin e futbollistit shqiptar Nazmi Gripshi. 28-vjeçari ka arritur marrëveshjen me klubin rus, duke firmosur një kontratë që do ta mbajë të lidhur me ekipin rus deri në vitin 2029.
Sipas informacioneve të bëra publike, transferimi i Gripshit nga klubi kazak Astana është realizuar për shumën e 500 mijë eurove. Me këtë lëvizje, mesfushori shqiptar nis një etapë të re në kampionatin rus, ku do të bashkohet me bashkëkombësin e tij, sulmuesin e Kombëtares shqiptare, Mirlind Daku, i cili është pjesë e Rubin Kazanit.
Gripshi pritet të jetë i gatshëm për debutimin e tij më 28 shkurt, në ndeshjen e kampionatit rus kundër Dinamo Makhaçkalas. Ende nuk ka një konfirmim zyrtar për përfshirjen e tij në formacion, por transferimi i fundit rrit gjasat që ai të jetë në dispozicion të stafit teknik.
View this post on Instagram
Nazmi Gripshi ishte pjesë e Astanës në Kazakistan përpara këtij transferimi. Ai u konsiderua një nga risitë e trajnerit të Kombëtares shqiptare, Silvinjo, për vitin 2025, duke tërhequr vëmendjen me paraqitjet e tij.
Në karrierën e tij, Gripshi ka luajtur për Teutën, Skënderbeun dhe Ballkanin. Me ekipin nga Kosova, nën drejtimin e trajnerit Ilir Daja, ai u shpall kampion, duke regjistruar një nga sukseset më të rëndësishme në karrierën e tij.
Transferimi në Rusi përfaqëson një hap të ri për mesfushorin shqiptar, i cili synon të konsolidohet në një kampionat më kompetitiv dhe të vijojë progresin e tij në arenën ndërkombëtare.
Lini një Përgjigje