FLASH
Shkruar nga Pamfleti
Policia gjermane ka bastisur selinë e Federatës Gjermane të Futbollit (DFB) në Frankfurt, në kuadër të një hetimi që lidhet me shpërndarjen e ftesave për akomodim në hotele dhe mijëra biletave të ndeshjeve gjatë Euro 2024.
Sipas gazetës Bild, kontrollet janë zhvilluar në disa rajone të Gjermanisë me urdhër të autoriteteve të landit të Renanisë Veriore-Vestfalisë. Përveç selisë së DFB-së, nën hetim janë vënë edhe administratat e disa qyteteve që mirëpritën ndeshjet e Kampionatit Europian.
Hetimi fokusohet te dy persona, një shtetas gjerman 66-vjeçar dhe një shtetas francez 46-vjeçar, të cilët dyshohen për trajtim të organizuar preferencial dhe ryshfet. Sipas raportimeve, në hetim mund të përfshihen edhe zyrtarë të administratës vendore që kanë ushtruar detyrën gjatë zhvillimit të turneut.
Kontrolle janë kryer në administratat e Gelsenkirchenit, Dortmundit, Dyseldorfit, Këlnit, Hamburgut, Berlinit, Frankfurtit, Shtutgartit, Mynihut dhe Lajpcigut. Gjithashtu janë bastisur dy kompani në landin e Renanisë Veriore-Vestfalisë dhe një tjetër në Bavari.
Sipas dyshimeve të hetuesve, shtetasi francez u kishte siguruar drejtuesve të zyrave të Euro 2024 në qytetet pritëse ftesa për të ndjekur ndeshje të rëndësishme në stadiume. Ndërkohë, 66-vjeçari gjerman po hetohet për çështje që lidhen me gjysmëfinalen mes Spanjës dhe Francës, e zhvilluar në Mynih.
Autoritetet dyshojnë se nga kjo skemë janë përfituar rreth 2.400 euro, ndërsa janë mbuluar edhe shpenzimet e udhëtimit dhe akomodimit në hotel. Sipas Bild, 66-vjeçari, i cili në atë periudhë ishte i punësuar në bashkinë e Gelsenkirchenit, por tashmë nuk mban më atë detyrë, ishte hetuar më herët edhe për dyshime për mashtrim, si dhe për mbajtje dhe përvetësim të pagave.
Lidhur me hetimin ka reaguar edhe ministri i Brendshëm i landit të Renanisë Veriore-Vestfalisë, Herbert Reul.
“Një biletë futbolli nuk është pjesë e pagës. Kushdo në shërbimin publik që pranon ryshfet do të marrë një vizitë nga ne. Evente të mëdha si Kampionati Europian varen nga besimi i qytetarëve, si te sporti, ashtu edhe te autoritetet që e bëjnë të mundur. Nuk do të lejojmë që ky besim të dëmtohet nga disa ftesa dhe bileta”, deklaroi Reul për Bild.
Lini një Përgjigje