Aktualitet 8 Nëntor 2023, 10:25

Afera 'Partizani'/ Kërkoi shuarje të masës 'detyrim paraqitje', nis seanca në GJKKO, Berisha nuk shkon

Shkruar nga Pamfleti

Afera 'Partizani'/ Kërkoi shuarje të masës

Ditën e sotme në orën 10:00 ka nisur seanca pas kërkesës së avokatëve të ish-kryeministri Sali Berisha, i cili kërkon shuarje mase 'detyrim paraqitje' për shkak të afateve.

Berisha ka refuzuar sërish të marrë pjesë në seancën e sotme, ndërsa ka dërguar dy avokatët e tij. Berisha kërkon shuarje të masës, i cili ka marrë nga GJKKO për aferën e privatizimit të ish-kompleksit Partizani, çështje për të cilën ish kryeministri është nën hetim. 

Por, kjo nuk është hera e parë që ish kryeministri saboton gjyqin në GJKKO duke mos u paraqitur. Sipas tij, dhënia e masës 'detyrim paraqitje' është anti kushtetuese dhe ai nuk do të shkojë në gjykatë asnjëherë.

"Vendim antishkushtetues, nuk do e zbatoj kurrë. Absolutisht jo nuk do paraqitem në SPAK...", është shprehur ai në daljet e tij për mediat.

Kërkesa e Berishës do të shqyrtohet nga gjyqtarja Irena Gjoka, për të cilën ish-kryeministri pati kërkuar të përjashtohej nga procesi gjyqësor që po zhvillohet ndaj tij për aferën e privatizimit të kompleksit ‘Partizani’.

Në seancë janë të pranishëm avokatët e Berishës, Sokol Mëngjesi dhe Genc Gjokutaj, të cilët kërkojnë shuarjen e masës "detyrim paraqitje" me arsyetimin se nuk janë respektuar afatet ligjore për marrjen e këtij vendimi. 

Gjithashtu, në orën 13:00 pritet të shqyrtohet kërkesa e Jamarbër Malltezit. Kërkesa shqyrtohet nga gjyqtarja e shkallës së parë, Irena Gjoka. Malltezi është lënë në burg nga gjykata pasi akuzohet për për korrupsion dhe pastrim parash lidhur me privatizimin e ish-kompleksit sportiv “Partizani”.

Akuzat e ngritura:

Sali Berisha- Korrupsion pasiv kryer në bashkëpunim, neni 260 dhe 25 i K.Penal

Jamarbër Malltezi – Korrupsion pasiv ne bashkëpunim Neni 260 dhe Pastrim i Produkteve ne bashkëpunim me Fatmir Bektashi neni 287 i K.Penal;

Fatmir Bektashi- Korrupsion aktiv dhe pastrim produktesh të veprës penale ne bashkëpunim me Jamarbër Malltezi.

Lidhur me çështjen e kompleksit Partizani, SPAK arrestoi në Rinas, Jamarbër Malltezin, ndërsa Sali Berisha dhe Fatmir Bektashi janë ndaluar të udhëtojnë jashtë shtetit dhe detyrohen të paraqiten në policinë gjyqësore. Sipas SPAK, ish-kryeministri Sali Berisha ka kryer korrupsion pasiv në bashkëpunim me Jamarbër Malltezin, bashkëshortin e vajzës së tij, ndërsa ka ndërmarrë veprime konkrete në miratim ligjesh dhe aktet nënligjore për t’i përshtatur sipas nevojave të pesë familjeve pronare në kompleksin sportiv Partizani, ku përfitues ishte drejtpërdrejt edhe dhëndri i tij. Sali Berisha kreu veprime aktive në kontrolle administrative për të ushtruar presion dhe dha urdhëra konkretë për përfundimin e procedurave të privatizimit në favor mes të tjerëve edhe të Malltezit, bashkëshorti i vajzës së tij. Po ashtu SPAK deklaroi se ish kryeministri Berisha kreu veprime aktive për të vendosur në dispozicion të Malltezit struktura të ndryshme të administratës shtetërore për realizimin e procesit të privatizimit të pronës shtetërore.

Malltezi dyshohet se ka kryer korrupsion pasiv në bashkëpunim me vjehrrin e tij Sali Berisha, duke shfrytëzuar pushtetin e tij si kryeministër, duke përfituar nga privatizimi i terreneve dhe objekteve sportive, nga ndryshimi i destinacionit nga zona sportive në zona banimi, shuma të konsiderueshme në cilësinë e investuesit nga shoqëria “Homeplan” sh.p.k., pa investuar në të, si dhe përfitime të marra para se të deklarohej si bashkortak në këtë shoqëri. Ndërsa në bashkëpunim me ndërtuesin Fatmir Bektashi, Malltezi dyshohet se ka kryer pastrim të produkteve të veprës penale, duke u paraqitur si investitor në punimet për ndërtimin e bllokut të banesave, ndërkohë që nuk rezulton të ketë investuar, duke kryer veprime financiare, transaksione të copëzuara, apo në cash, për të fshehur origjinën dhe për të përfituar në mënyrë të paligjshme shuma deri mbi 5 milionë euro.

berisha seance gjkko afera partizani