FLASH
Shkruar nga Pamfleti
Aksi rrugor Librazhd–Prrenjas është rikthyer në funksion për qarkullimin e automjeteve pas ndërhyrjeve të fundit në terren.
Autoriteti Rrugor Shqiptar bën të ditur se segmenti i përkohshëm është shtruar fillimisht me çakëll të ngjeshur. Kjo zgjidhje lejon kalimin e të gjitha llojeve të mjeteve, përfshirë edhe automjetet me tonazh të rëndë.
Sipas institucionit, gjatë rreth dhjetë ditëve të para rruga do të kalojë një fazë konsolidimi. Stabilizimi pritet të arrihet përmes ngjeshjes natyrale të shtresës dhe lëvizjes së automjeteve mbi këtë segment.
Pas përfundimit të kësaj periudhe do të nisë procesi i asfaltimit. Ndërhyrja synon ta kthejë segmentin në një aks të standardizuar dhe plotësisht funksional.
Ky segment lidh Tiranën me zonën juglindore të vendit dhe shërben si korridor i rëndësishëm për lëvizjen e qytetarëve dhe transportin e mallrave.
Rikthimi i qarkullimit në këtë aks pritet të lehtësojë lëvizjen dhe aktivitetin ekonomik në zonë pas ndërprerjes së përkohshme të trafikut.
Lini një Përgjigje