FLASH
Shkruar nga Pamfleti
Biznesmeni i betonit bregdetar, vihet në qendër të hetimit të SPAK për pastrim parash, me tokë publike pa garë dhe kapital 5 milionë eurosh që nxjerr humbje
SPAK dhe Byroja Kombëtare e Hetimit kontrollojnë Redi Pezën, zhvilluesin e "Porto Lalzi", në kuadër të një operacioni për pastrim parash nga investimet në beton dhe turizëm. Peza nuk është mes të arrestuarve, por kompania e tij del palë kontraktuese në një aset të sekuestruar, ndërsa kapitali 5 milionë euro, humbjet e njëpasnjëshme dhe 55 mijë metrat katrorë tokë publike e dhënë pa garë e vendosin atë në qendër të dosjes.
Prokuroria e Posaçme dhe Byroja Kombëtare e Hetimit ushtruan më 16 qershor 2026 kontroll te biznesmeni Redi Peza, i njohur si zhvilluesi pas kompleksit "Porto Lalzi" dhe shoqërisë "Sviluppo Mare 1". Kontrolli ishte pjesë e një operacioni në 23 ambiente, në kuadër të një hetimi të SPAK ku dyshohet se para të pastra janë futur në ekonomi përmes investimeve në beton, pasuri të paluajtshme dhe projekte turistike. Redi Peza nuk figuron mes personave të arrestuar. Por dosja e nxjerr emrin e tij dhe kompanitë e tij në pikën ku takohen tre tregime që flasin vetë: toka publike e dhënë pa garë, kapitali 5 milionë euro që nxjerr humbje dhe një marrëveshje kontraktuale me një shoqëri tashmë në sekuestro.
Pasi e la për vite të tëra të vepronte në hije si investitori i madh i bregdetit, tashmë SPAK e ka vendosur Redi Pezën në qendër të një hetimi për pastrim parash. I ashtuquajturi biznesmen i turizmit, që deri dje pozicionohej si shembulli i investitorit të suksesshëm, sot gjendet përballë një dosjeje që lidh emrin e tij me tokën publike, kapitalin pesëmilionësh dhe humbjet e njëpasnjëshme.
Dihen kompetencat që ka SPAK, por Redi Peza, duke qenë i preferuari i pazareve me tokën publike, pritet të japë llogari për mënyrën se si një kompani me kapital 5 milionë euro arrin të ketë xhiro mezi 400 mijë euro dhe humbje të njëpasnjëshme. Ashtu si çdo "usta" i pazareve të mëdha, Peza ka ditur të marrë 55 mijë metra katrorë tokë shtetërore pa garë, me çmim 1,100 lekë për metër katror, një vlerë që u denoncua publikisht si shumë herë nën çmimin real të tregut.
Në fakt, Redi Peza e ka nisur "zanatin" e menaxhimit të projekteve të mëdha pikërisht me këtë marrëveshje të Këshillit të Ministrave nr. 292, më 19 maj 2021. Për "meritat" si përfitues i tokës publike pa garë, qeveria ia dha 55 mijë metra katrorë bregdetarë në Hamallaj, të cilët sot ndodhen brenda perimetrit të hetimit të SPAK për pastrim parash.
Aq i harbuar ishte Redi Peza në përfitimet nga toka publike, sa kompania e tij "LALZI MARINA" u themelua me kapital 514,700,000 lekë, plot 5 milionë euro, vetëm dy muaj para marrëveshjes me Këshillin e Ministrave. Por pasqyrat financiare tregojnë diçka tjetër: xhiro vjetore në 2022 mezi arrin 39,423,901 lekë, ndërsa humbjet e njëpasnjëshme u regjistruan në 6,378,230 lekë për 2021 dhe 3,790,735 lekë për 2022. Hendeku mes kapitalit pesëmilionësh dhe xhiros që mezi kalon 400 mijë euro, me humbje, është pikërisht modeli klasik që SPAK ndjek në çdo hetim për pastrim parash.
Me një marrëveshje nën sekuestro, me kapital që nxjerr humbje dhe me tokë publike në hetim
- Marrëveshja mes shoqërisë "Sviluppo Mare 1" të Redi Pezës dhe shoqërisë "Aliu Road House" ndodhet brenda sekuestros së SPAK për kompleksin Porto Lalzi / Lalzi Marina Seaside në Hamallaj. Kompania e Pezës del palë kontraktuese në një aset që prokuroria e konsideron pjesë të një rrjeti nën hetim për pastrim parash.
- Kapitali themeltar i shoqërisë "LALZI MARINA" prej 514,700,000 lekësh (5 milionë euro) përballet me humbje të njëpasnjëshme dhe një xhiro vjetore prej vetëm 39,423,901 lekësh në 2022. Pyetja që ngrihet është e thjeshtë: me çfarë parash u mbush ky kapital dhe përse një biznes që humb para vazhdon të ekzistojë?
- 55 mijë metra katrorë tokë shtetërore në bregdetin e Hamallajt iu dhanë pa garë shoqërisë "Sviluppo Mare 1" me pronar Redi Pezën, për 59,565,000 lekë, rreth 1,100 lekë për metër katror, një çmim që u denoncua publikisht si shumë herë nën vlerën e tregut. E njëjta tokë publike ndodhet sot brenda perimetrit të një hetimi të SPAK për pastrim parash.
- Më 24 tetor 2022 u vendos sekuestro konservative mbi kuotat e shoqërisë si debitore, dhe më 26 maj 2023 Drejtoria e Përgjithshme e Tatimeve kërkoi masën e sigurimit të detyrimit tatimor mbi të. Një kompani që sekuestrohet, që ndiqet nga tatimet dhe që përfundon brenda një hetimi të SPAK për pastrim parash, nuk është thjesht një rastësi.
Në vitet 2021–2026, pavarësisht se kompania e tij humbiste para dhe sekuestrohej, Redi Peza vazhdoi të pozicionohej si investitori i madh i bregdetit, ndërsa toka publike që mori pa garë tashmë është në qendër të hetimit të SPAK.
Ndërsa tani, SPAK dhe BKH e kanë vendosur Redi Pezën në qendër të një dosjeje për pastrim parash, për të vetmen "aftësi" që i njihet: di të marrë tokë publike pa garë dhe të mbushë kompanitë me kapital pesëmilionësh që nxjerrin humbje.
Nuk është e vështirë të kuptohet se për çfarë shërbimesh të tilla ky xhambaz i betonit bregdetar, i marrëveshjeve nën sekuestro dhe i kapitalit që nxjerr humbje, nuk është arrestuar deri tani, ndërsa kontrolli i BKH-së dhe dosja e SPAK flasin vetë./Pamfleti
Gërmoni gërmoni se do dali dhe Fantomasi (Blend Fevqiu), me këtë Redi Pezën. Kanë grabitur e kanë vjedhur nga të katër anët bashkë.