Anti-Mafia27 Mars 2023, 12:50

Te “Toptani”, 88 dyqane me qira: 42 zero tatim si biznese nën 14 milionë lekë dhe 46 të pa regjistruar fare

Shkruar nga Pamfleti
Te “Toptani”, 88 dyqane me qira: 42 zero tatim si biznese nën
"Toptani Shoping Center"

Skandal tjetër financiar është fakti se gjithë kjo kullë tregtare me 61 mijë m2 mjedise në qendër të Tiranës, lejohet të ushtrojë aktivitet si kioskë pa fatura TVSH, ndërkohë që me urdhër të Bablokut, nuk ka paguar 2.4 milionë Euro taksë të ndikimit në infrastrukturë dhe 1.8 milionë Euro taksë të investimit...

Brenda kullës tregtare me xhama e reklama të shndritshme “Toptani Shopping Center” nuk mungon asgjë, përveç zbatimit të ligjit për tatimet. Bosi i saj Bashkim Ulaj nuk e përfill shtetin, ngaqë është i preferuar i kryeministrit e siç thonë, Babloku ka pjesën atje.

Megjithëse në Drejtorinë e Tatimeve, skeda 6-vjeçare e aktivitetit tregtar të qendrës “Toptani” po mbahet “top sekret”, redaksia “Pamfleti” arriti të marrë informacion konfidencial nga burime brenda Ministrisë së Financave, për vjedhjet nëpërmjet mashtrimit tatimor.

Qendra “Toptani”, në total ka 102 njësi tregtare, 88 prej të cilave i ka dhënë me qira qysh prej muajit mars 2017 kur filloi aktivitetin, ndërsa 14 njësi janë dhënë me qira me afate të shkurtra, por ka edhe 600 poste parkimi nëntokësor të deklaruar në tatime.

Nga 88 dyqane, bar kafe, restorante e këmbim valutor të dhëna me qira mbi 5 vite te qendra “Toptani”, vetëm 42 janë të regjistruar në tatime si njësi tregtare, ndërsa 46 të tjera, prej 4-5 vitesh janë të pa regjistruara në tatime, sikur gjoja nuk janë të dhënë me qira, kur ato figurojnë të tilla, sipas listës së subjekteve që ka deklaruar qendra “Toptani” deri më 28 mars 2023.

Dyqanet e dhëna me qira, nuk janë regjistruar nga individët apo firmat që i kanë marrë, por në juridiksion tatimor të firmës fantazmë “A.B.A.U” Sh.p.k, me pronar e punonjës të vetëm Ahmet e Astrit Ulaj, vëllezër të Bashkim Ulajt.

Megjithëse dyqanet, bar-kafet, restorantet, dyqanet e floririt dhe zyrat e këmbimit valutor, janë pjesë të kompanive të mëdha prodhimi, shërbimi e tregtimi të huaja, shqiptare e bankave private, këto 42 njësi nuk paguajnë 15% tatim-fitimi, sepse Bashkim Ulaj në pazar me tatimet, i deklaron me të ardhura minimale nën 8 e 14 milionë lekë në vit, kur ato e kanë mbi këtë vlerë.

 

Skandali thellohet me tej, prej faktit që edhe nga këto 42 njësi tregtare të regjistruara në tatime, 30 prej tyre nxirren me humbje, por çuditërisht i mbajnë hapur, madje disa i nxjerrin me të ardhura 1-2 milionë lekë të vjetra në vit, ose 80-160 USD në muaj.

Nuk janë regjistruar, ose janë deklaruar me të ardhura si kioska e me humbje, dyqanet  “Adidas-Sport”, “Versace Jeans”, “Toptani Jungle për Fëmijë”; “355-Mobile” pajisje elektronike; “Antony Morato” dhe “Bulgarini” me veshje firmato të çdo lloji për veshje; “BRUMS” dyqan  fëmijësh; Bar-Restorant “Toptani”, 2 Bar-restorante “Nona” të Uran Derrit nga Hasi; “Cleopatra Personal Care” dhe “Beauty&City” me produkte kozmetike; “EM Diamonds&Jewelry” e “Estel Jewellery” me bizhuteri; “Bufalo” e “Carnival” me këpucë; “Bulgarini” me veshje firmato; “Buzz Sport”; “Calzedonia” me veshje intime etj., etj., emrat e të cilave do t’i publikojmë me të dhëna e prova abuzimi në vijim.

Dy pyetje: 1. Përse në shkelje të ligjit, subjektet që kanë marrë mjedise me qira, regjistrohen nga qendra “Toptani”, kur ato janë pjesë të kompanive e markave të veçanta?

                  2. Gjersa mjediset i ka në pronësi qendra “Toptani” dhe i jep me qira e regjistron si akvite të veta, përse nuk tatohet si qendër tregtare komplekse, që nga të ardhurat e fitimi nga qiratë, pagat, sigurimet shoqërore e shëndetësore të punonjësve, taksat për pastrimin, ndriçimin e reklamat?

Skandal tjetër financiar, është fakti se gjithë kjo kullë tregtare me 61 mijë m2 mjedise në qendër të Tiranës, lejohet të ushtrojë aktivitet si kioskë pa fatura 20% TVSH, ndërkohë që me urdhër të Bablokut, nuk ka paguar 2.4 milionë Euro taksë të ndikimit në infrastrukturë dhe 1.8 milionë Euro taksë të investimit.(Vijon)./Pamfleti

dyqane me qira