FLASH
Shkruar nga Pamfleti
Shtëpia e Bardhë ka deklaruar se paralajmërimi i FBI për një sulm të mundshëm me dronë iranianë në Kaliforni u bazua në një informacion të paverifikuar dhe se nuk ka ekzistuar kurrë një kërcënim real nga Irani ndaj territorit të Shteteve të Bashkuara.
Zëdhënësja e Shtëpisë së Bardhë, Karoline Leavitt, tha se alarmi i shpërndarë muajin e kaluar tek autoritetet e rendit në Kaliforni bazohej në një email që përmbante një informacion të pakonfirmuar.
“Në mënyrë që të jemi të qartë: nuk ka ekzistuar dhe nuk ekziston asnjë kërcënim i tillë nga Irani ndaj atdheut tonë”, shkroi Leavitt në një postim në platformën X.
Paralajmërimi i FBI-së ishte shpërndarë në fund të shkurtit për departamentet e policisë në Kaliforni dhe përmendte mundësinë që Irani të kryente një sulm të papritur me dronë nga një anije e paidentifikuar pranë brigjeve të SHBA-së, në rast se Uashingtoni do të godiste objektiva në Iran.
Në dokument thuhej se objektivat e mundshëm mund të ndodheshin në bregun perëndimor të Shteteve të Bashkuara, veçanërisht në Kaliforni.
Paralajmërimi erdhi në një moment tensionesh të larta, pasi SHBA dhe Izraeli ndërmorën sulme ndaj Iranit pothuajse dy javë më parë, duke përshkallëzuar konfliktin në rajonin e Gjirit.
Teherani ka reaguar me sulme hakmarrëse ndaj Izraelit dhe vendeve aleate të SHBA-së në rajon, pas goditjeve që vranë disa zyrtarë të lartë iranianë, përfshirë edhe liderin suprem të vendit.
Megjithatë, presidenti amerikan Donald Trump deklaroi të mërkurën se nuk është i shqetësuar për mundësinë që Irani të zgjerojë hakmarrjen e tij deri në territorin amerikan.
“Jo, nuk jam”, u tha Trump gazetarëve kur u pyet për këtë skenar.
Sqarimi i Shtëpisë së Bardhë synon të ulë shqetësimet pas alarmit të shpërndarë nga FBI, i cili kishte ngritur dyshime për një sulm të mundshëm iranian në territorin e SHBA-së.
Lini një Përgjigje