FLASH
Shkruar nga Pamfleti
Bashkimi Europian është "gati për të gjitha skenarët", deklaroi sot presidentja e Komisionit Europian, Ursula von der Leyen, pas kërcënimeve amerikane për një tarifë shtesë 25% mbi automjetet që importohen nga BE.
"Marrëveshja është marrëveshje", kujtoi megjithatë gjatë një konference për shtyp në Jerevan, duke iu referuar marrëveshjes tregtare mes BE-së dhe administratës Trump, e cila u arrit në korrik dhe kufizonte në 15% tarifat doganore për automjetet europiane që shiten në Shtetet e Bashkuara.
"Kemi një marrëveshje dhe thelbi i kësaj marrëveshjeje është mirëqenia, rregullat e përbashkëta dhe besueshmëria", deklaroi gjithashtu duke kujtuar se Shtetet e Bashkuara janë angazhuar të respektojnë kufijtë e përcaktuar në korrik 2025.
Të premten, Donald Trump kërcënoi bllokun europian me tarifa të reja shtesë doganore për makinat dhe kamionët që eksportohen drejt Shteteve të Bashkuara, duke akuzuar BE-në se nuk po respekton marrëveshjen tregtare të nënshkruar mes dy brigjeve të Atlantikut.
Komisioneri europian për Tregtinë, Maroš Šefčovič, pritet të takohet sot në Paris me përfaqësuesin e Shtëpisë së Bardhë për tregtinë, Jamieson Greer, në kuadër të një takimi ministror të Grupit të Shtatë (G7), vendeve më të industrializuara, në kryeqytetin francez.
Dje, të hënën, Komisioni Europian konfirmoi vullnetin për të zbatuar marrëveshjen e nënshkruar, duke hedhur poshtë akuzat amerikane.
"Ne po e zbatojmë marrëveshjen që nga dita e parë dhe mbetemi plotësisht të përkushtuar për të respektuar angazhimet tona", deklaroi zëdhënësi i Komisionit, Thomas Regnier.
Parlamenti Europian e miratoi me kushte marrëveshjen mes Shteteve të Bashkuara dhe BE-së, por procedurat e brendshme të bllokut parashikojnë që ajo duhet të negociohet edhe me shtetet anëtare përpara se të zbatohet zyrtarisht.
Sipas Regnier, BE-ja e ka mbajtur Uashingtonin "plotësisht të informuar gjatë gjithë procesit" dhe ka synuar të "qetësojë palën tjetër të Atlantikut, puna po vazhdon. Po arrihet përparim".
Lini një Përgjigje