FLASH
Shkruar nga Pamfleti
Turqia propozon një raund të ri negociatash mes Ukrainës, SHBA-së dhe Rusisë, ndërsa Kievi dhe Ankaraja bien dakord për projekte të përbashkëta në energji dhe siguri
Presidenti i Ukrainës, Volodymyr Zelensky, konfirmoi se Turqia është e gatshme të presë një raund të ri negociatash që do të përfshijnë Ukrainën, Shtetet e Bashkuara dhe Rusinë, pas një takimi të nivelit të lartë me presidentin turk Recep Tayyip Erdogan në Stamboll më 4 prill. Lajmi u bë i ditur nga Zyra e Presidentit të Ukrainës.
Gjatë takimit, Erdogan riafirmoi gatishmërinë e Turqisë për të luajtur një rol aktiv në arritjen e një paqeje të qëndrueshme dhe propozoi organizimin e bisedimeve të reja në Stamboll. “Erdogan propozon zhvillimin e bisedimeve për paqe në Stamboll; ne jemi të gatshëm të marrim pjesë,” deklaroi Zelensky për mediat pas një takimi të veçantë me Patriarkun Ekumenik Bartolomeu.
Dy liderët diskutuan gjithashtu hapa konkretë për bashkëpunim në fushën e energjisë, përfshirë infrastrukturën e gazit dhe zhvillimin e fushave të reja të gazit. Zelensky theksoi se ekipet përkatëse do të finalizojnë detajet e marrëveshjeve në ditët në vijim.
Në një reagim në Telegram, Zelensky njoftoi se palët ranë dakord për hapa të rinj në bashkëpunimin e sigurisë, duke përfshirë mbështetje nga Ukraina në fusha si ekspertiza, teknologjia dhe përvoja. Ai shprehu gjithashtu mirënjohje ndaj popullit turk për mbështetjen e vazhdueshme ndaj pavarësisë dhe integritetit territorial të Ukrainës.
Vizita e Zelenskyt në Turqi vjen në një moment të rëndësishëm diplomatik, vetëm një ditë pasi Erdogan zhvilloi një bisedë telefonike me presidentin rus Vladimir Putin për sigurinë në Detin e Zi dhe konfliktin në Lindjen e Mesme. Rusia ka akuzuar së fundmi Ukrainën për sulm ndaj gazsjellësit TurkStream, një pretendim që Kievi e ka mohuar. Ndërkohë, Moska nuk i është përgjigjur propozimit të Zelenskyt për armëpushim gjatë Pashkëve dhe për mbrojtjen e infrastrukturës energjetike.
Zelensky ka lidhur më herët konfliktet në Evropë dhe Lindjen e Mesme, duke akuzuar Rusinë për nxitje tensionesh në rajonin e Gjirit përmes mbështetjes ndaj Iranit. Në këtë kontekst, bisedimet në Stamboll synojnë të adresojnë kërcënimet e ndërlidhura të sigurisë dhe të forcojnë rolin e Turqisë si ndërmjetës në çështjet rajonale të logjistikës dhe sigurisë energjetike.
Lini një Përgjigje