FLASH
Shkruar nga Pamfleti
Marrëdhëniet mes Shtëpisë së Bardhë dhe pjesës tjetër të Perëndimit paraqiten të tensionuara. Madje, ekziston mundësia që Trump të mos marrë pjesë fizikisht në samitin e G7 që do të zhvillohet në mes të qershorit në Evian, Francë...
Një Këshill Evropian zhvillohet nën hijen e Donald Trump. Ndërsa në ishullin e Qipros, 27 vendet anëtare diskutojnë zgjidhjet për të përballuar krizën energjetike të shkaktuar nga lufta në Gjirin Persik, e lidhur me politikat e presidentit amerikan dhe Benjamin Netanyahu, nga Uashingtoni mbërrijnë lajme që shtojnë tensionet.
Sipas këtyre informacioneve, Pentagoni po shqyrton “masa” ndaj aleatëve të NATO-s që konsiderohen të pasigurt në mbështetjen e konfliktit me Iranin. Mes opsioneve përmendet edhe pezullimi i Spanjës nga Aleanca Atlantike, si dhe rishikimi i qëndrimit amerikan ndaj pretendimit britanik për Ishujt Falkland.
Marrëdhëniet mes Shtëpisë së Bardhë dhe pjesës tjetër të Perëndimit paraqiten të tensionuara. Madje, ekziston mundësia që Trump të mos marrë pjesë fizikisht në samitin e G7 që do të zhvillohet në mes të qershorit në Evian, Francë. Gjatë diskutimeve në Këshill është përfolur se ai mund të kufizohet vetëm në një lidhje me video, çka do të interpretohej si një sinjal i ftohtë ndaj G7 dhe edhe ndaj presidentit francez Emmanuel Macron, i cili kishte përshtatur datat e samitit për të shmangur përplasjen me 80-vjetorin e Trump më 14 qershor.
Edhe marrëdhëniet mes SHBA dhe Italisë mbeten të ndërlikuara. Kryeministrja Giorgia Meloni deklaroi gjatë një pauze të Këshillit informal në Qipro se nuk ka pasur kontakte të fundit me Trump. Ajo theksoi se marrëdhëniet me SHBA mbeten të qëndrueshme, por shtoi se aktualisht nuk po ndërmerr hapa të veçantë për të rindërtuar raportin personal me ish-presidentin.
Meloni u shpreh kritike ndaj ideve që qarkullojnë nga Pentagoni dhe u pozicionua në një linjë me kryeministrin spanjoll Pedro Sánchez. Ajo theksoi nevojën për forcimin e NATO-s dhe të shtyllës evropiane të Aleancës si element plotësues. Gjithashtu, ajo shprehu rezerva për vendimin e Trump për të ftuar Vladimir Putin në samitin e G20 që do të mbahet në Miami më 14-15 dhjetor, duke nënvizuar se përparësi duhet të jetë presioni ndaj Rusisë për hapa konkretë.
Një tjetër çështje lidhet me misionin UNIFIL në Liban. Gjatë ditës, Meloni u takua me presidentin libanez Joseph Aoun. Shtetet e Bashkuara shfaqen hezituese për zgjatjen e mandatit të misionit, ndërsa Italia dhe Franca po punojnë për të kapërcyer kundërshtimin amerikan, i ndikuar nga Izraeli. Italia aktualisht ka rreth 1.300 trupa në terren. Meloni theksoi se prania ndërkombëtare në kufirin mes Libanit dhe Izraelit mbetet thelbësore dhe se çështja po diskutohet me partnerët, duke kërkuar edhe një bazë ligjore të përshtatshme dhe përfshirjen e parlamentit. Nga viti 2027, pjesëmarrja në një mision pa mandatin e OKB-së konsiderohet një mundësi reale.
Në samitin e Qipros u diskutua edhe për krizën e çmimeve të energjisë. Meloni i cilësoi “të pamjaftueshme” masat e Komisionit Evropian dhe kërkoi më shumë fleksibilitet, veçanërisht përjashtimin e shpenzimeve të lidhura me krizën nga llogaritja e deficitit. Kjo qasje mbështetet edhe nga Spanja, e cila kërkon gjithashtu zgjatjen e fondit të rimëkëmbjes. Në anën tjetër, kancelari gjerman Friedrich Merz mban një qëndrim të ndryshëm. Ai zhvilloi një takim të gjatë me Melonin, i cili, sipas saj, nuk solli një zgjidhje përfundimtare./Përshtatur nga "Il Giornale"
Lini një Përgjigje