FLASH
Shkruar nga Pamfleti
Evropa po përgatitet për një kundërpërgjigje të fortë tregtare ndaj kërcënimeve të presidentit të SHBA-së, Donald Trump, për vendosjen e tarifave doganore ndaj disa vendeve evropiane. Shtëpia e Bardhë ka propozuar tarifa prej 10% duke nisur nga 1 shkurti për tetë vende evropiane që kanë dërguar trupa në Groenlandë.
Në përgjigje, kryeqytetet evropiane po shqyrtojnë masa hakmarrëse, përfshirë vendosjen e kundër-tarifave doganore ndaj produkteve amerikane me vlerë deri në 93 miliardë euro, ose kufizimin e aksesit të kompanive amerikane në tregun evropian.
Sipas mediave ndërkombëtare, këto masa janë hartuar për t’u dhënë udhëheqësve evropianë më shumë ndikim përpara takimeve të tyre me presidentin Trump në kuadër të Forumit Ekonomik Botëror në Davos, që zhvillohet këtë javë.
Donald Trump pritet të takohet të hënën pasdite në qytetin zviceran me disa liderë evropianë, përfshirë Presidenten e Komisionit Evropian, Ursula von der Leyen. Fillimisht, fokusi i takimeve ishte lufta në Ukrainë, por rendi i ditës është rishikuar për t’i dhënë përparësi krizës së Groenlandës.
Zyrtarë evropianë shpresojnë se kërcënimet për hakmarrje tregtare do të rrisin presionin politik brenda Shteteve të Bashkuara dhe do ta shtyjnë Trump të tërhiqet nga planet për vendosjen e tarifave doganore.
Lini një Përgjigje