FLASH
Shkruar nga Pamfleti
Bashkimi Evropian disponon mjetet e nevojshme për t’iu përgjigjur valës së re të tarifave të shpallura nga Shtetet e Bashkuara, deklaroi për Financial Times ministri francez i Tregtisë, Nikolas Forisier. Ai u bëri thirrje vendeve anëtare të adoptojnë një “qasje të përbashkët” pas vendimit të presidentit amerikan Donald Trump për të vendosur një tarifë shtesë prej 10% mbi importet.
Sipas Financial Times, Trump e ndërmori këtë hap në reagim ndaj një vendimi të Gjykatës së Lartë të SHBA-së, i cili dënoi politikën e tij tarifore.
Forisier tha se është në diskutime me homologët e tij në BE dhe me Komisionin Evropian për të koordinuar përgjigjen. “Nëse do të jetë e nevojshme, Bashkimi Evropian ka mjetet e duhura”, deklaroi ai për gazetën britanike.
Zyrtarë francezë theksuan se është ende herët për të përcaktuar reagimin konkret të BE-së. Megjithatë, ndër opsionet përfshihet aktivizimi i Instrumentit Kundër Detyrimit (Anti-Coercion Instrument – ACI), i cili lejon masa ndaj kompanive amerikane, përfshirë sektorin e teknologjisë.
ACI parashikon një gamë të gjerë veprimesh, nga kontrollet e eksporteve dhe vendosja e tarifave mbi shërbimet, deri te përjashtimi i kompanive amerikane nga kontratat e prokurimit publik në BE. Gjithashtu, ekziston një paketë kundërmasash me tarifa mbi produkte amerikane me vlerë mbi 90 miliardë euro, e cila mund të vihet në zbatim.
Ministri francez vlerësoi se presioni nga Uashingtoni ka forcuar unitetin e bllokut evropian, por theksoi se BE duhet të jetë e gatshme të reagojë. “Nuk mund të jemi më naivë. Duhet të përdorim mjetet tona dhe jo vetëm të flasim për to. Nuk duam të jemi të varur apo peng”, u shpreh ai.
Parlamenti Evropian do të mblidhet të hënën për të diskutuar shtyrjen e mëtejshme të ratifikimit të një marrëveshjeje tregtare të arritur me Uashingtonin vitin e kaluar.
Ndërkohë, sipas raportimit, administrata Trump vazhdon rritjen e tarifave, megjithëse ato kanë ndikuar në rritjen e çmimeve dhe kanë dëmtuar kompanitë që varen nga eksportet.
Guvernatori i Bankës së Italisë, Fabio Paneta, deklaroi gjatë një konference për shtyp në Venecia se ndikimi fillestar i tarifave u përthith nga marzhet e fitimit të kompanive amerikane, por më pas u transferua te konsumatorët. “Vlerësohet se tarifat kanë kontribuar me më shumë se gjysmë pikë përqindjeje në inflacionin, i cili mbetet mbi objektivin e Rezervës Federale”, tha ai, duke iu referuar nivelit prej 2,4% në janar.
Ministria e Tregtisë e Indisë njoftoi se po shqyrton zhvillimet dhe pasojat e tyre.
Lini një Përgjigje