FLASH
Shkruar nga Pamfleti
Rreth 200 mijë persona u mblodhën pasditen e së premtes në Mynih për të protestuar kundër autoriteteve iraniane, në kohën kur në qytet po zhvillohet Konferenca e Sigurisë.
Protestuesit u tubuan në mënyrë paqësore në Theresienwiese, një nga hapësirat më të mëdha publike në pjesën perëndimore të qytetit. Ata kërkuan përfundimin e Republikës Islamike, pas shtypjes me dhunë të valës së protestave që kishte nisur në fund të dhjetorit në Iran.
Në tubim mori pjesë edhe Reza Pahlavi, udhëheqës i opozitës iraniane në mërgim dhe djali i ish-Shahut të Iranit, i rrëzuar nga pushteti në vitin 1979. Gjatë fjalës së tij, Pahlavi i bëri thirrje Presidentit të Shteteve të Bashkuara, Donald Trump, që të “ndihmojë” popullin iranian.
“Është koha për t’i dhënë fund Republikës Islamike. Kjo është kërkesa që del nga gjakderdhja e bashkatdhetarëve të mi”, deklaroi ai. Duke iu drejtuar Presidentit amerikan, Pahlavi shtoi se iranianët kishin dëgjuar deklaratat e tij se “ndihma është rrugës”. “Ata ju besojnë. Ndihmojini”, u shpreh ai.
Demonstrata në Mynih u organizua nga shoqata “Rrethi i Mynihut”. Një pjesë e pjesëmarrësve valëvitën flamuj iranianë të periudhës së Shahut dhe mbanin fotografi të Pahlavit. Disa protestues u dhuruan lule efektivëve të policisë. Folësit në tubim kërkuan një tranzicion paqësor dhe demokratik në Iran, si dhe ndjekjen penale të drejtuesve aktualë në Teheran për veprimet ndaj qytetarëve.
Organizatorët njoftuan gjithashtu për demonstrata të tjera në Toronto dhe Los Anxhelos, si dhe për thirrje për protesta në vende të ndryshme të botës kundër udhëheqjes iraniane.
Sipas raportimeve për protestat në Iran në fund të vitit, autoritetet i shtypën ato me forcë.
Lini një Përgjigje