Bota 7 Shtator 2023, 08:58

Lufta në Ukrainë, Rusia sulmon sërish portin në Odesa

Shkruar nga Pamfleti

Lufta në Ukrainë, Rusia sulmon sërish portin në Odesa

Rusia ka sulmuar sërish Ukrainën mëngjesin e sotëm. Mësohet se infrastruktura e portit ukrainas është dëmtuar nga një sulm i ri me dronë, ndërkohë Rusia shprehet se ka rrëzuar dronë afër Moskës dhe dy rajoneve të tjera.

Një depo e grurit dhe ndërtesa administrative u dëmtuan në sulmin e sotëm në Izmail, port në Danub në jugperëndim të Odesës, tha Oleh Kiper guvernator i këtij rajoni. Një person është lënduar gjatë sulmit. Sipas Kiper, ky ishte sulmi i katërt në këtë port në pesë ditët e fundit.

Rusia ka intensifikuar sulmet ndaj infrastrukturës së eksportit të drithërave të Ukrainës në mes të bisedimeve për ringjalljen e marrëveshjes së drithërave, që do të lejonte eksportet e sigurta të grurit nga portet ukrainase në Detin e Zi.

Rusia u largua nga kjo marrëveshje në korrik, një vit pasi e njëjta u arrit me ndërmjetësimin e Kombeve të Bashkuara dhe Turqisë. Në Rusi, autoritetet thanë se kanë rrëzuar dronë afër Moskës, në rajonin jugor të Rostovit dhe në rajonin Brynaks në jugperëndim.

Sipas agjencisë së lajmeve TASS, tri ndërtesa janë dëmtuar në qytetin Rostov-Mbi-Don, që gjendet 1.000 kilometra në jug të Moskës. Ky qytet ku jetojnë 1 milion banorë është shtëpi i qarkut jugor të ushtrisë ruse. Po ashtu është raportuar për një shpërthim afër selisë së ushtrisë.

Vasily Golubev, guvernator i rajonit të Rostovit, tha se një person është lënduar pas rrëzimit të një droni në qendër të qytetit. Në Brijansk, nga copëzat e dronëve të shkatërruar janë dëmtuar dritaret në stacionin e trenit dhe janë dëmtuar makina të parkuara aty pranë, raportoi agjencia Interfax.

Sulmet e reja me dronë vijnë një ditë pasi 17 persona u vranë dhe dhjetëra të tjerë u plagosën pas një sulmi rus me raketa në një treg në lindje të Ukrainës.

 

rusia lufte ukraine sulm