FLASH
Shkruar nga Pamfleti
Irani ka rënë dakord për një marrëveshje sekrete armësh me Rusinë me vlerë 500 milionë euro, për blerjen e mijëra raketave të avancuara të lëvizshme kundërajrore, raportoi të dielën gazeta britanike Financial Times (FT).
Sipas raportimit, marrëveshja u nënshkrua në Moskë në dhjetor dhe parashikon që Rusia të dorëzojë 500 njësi lëshuese portative të tipit “Verba” dhe 2.500 raketa “9M336” brenda tre viteve. FT citon dokumente ruse të rrjedhura dhe disa persona të njohur me marrëveshjen.
Dorëzimet, sipas dokumenteve të cituara nga FT, do të kryhen në tre këste, nga viti 2027 deri në vitin 2029.
Marrëveshjen e kanë negociuar eksportuesi shtetëror rus i armëve, Rosoboronexport, dhe përfaqësuesi në Moskë i Ministrisë iraniane të Mbrojtjes dhe Logjistikës së Forcave të Armatosura (MODAFL), shkruan FT.
Sipas një kontrate të parë nga gazeta, Teherani ka paraqitur kërkesën zyrtare për këto sisteme në korrik të vitit të kaluar. Në qershor të po atij viti, forcat amerikane goditën tre objektet kryesore bërthamore të Iranit, ndërsa vendi ishte përfshirë në fushatën ushtarake të Izraelit kundër Iranit.
Presidenti amerikan Donald Trump deklaroi se objektet kryesore bërthamore të Iranit u shkatërruan nga sulmi. Megjithatë, sipas një vlerësimi paraprak të inteligjencës amerikane në atë kohë, sulmet ajrore të SHBA-së nuk e shkatërruan kapacitetin bërthamor të Iranit, por vetëm e vonuan atë për disa muaj. Zyrtarët iranianë kanë deklaruar vazhdimisht se vendi e ka rikuperuar dëmin e pësuar gjatë luftës dhe se kapacitetet e tij janë më të forta se më parë.
Rusia dhe Irani kanë nënshkruar një traktat partneriteti strategjik, i cili nuk përfshin klauzolë për mbrojtje të ndërsjellë. Në fillim të shkurtit, një korvetë e marinës ruse zhvilloi manovra të përbashkëta me marinën iraniane në Gjirin e Omanit, sipas Ministrisë ruse të Mbrojtjes.
Lini një Përgjigje