FLASH
Shkruar nga Pamfleti
Një dokument federal i publikuar së fundmi nga Departamenti Amerikan i Drejtësisë rihap pikëpyetjet për rrethanat e vdekjes së financierit të dënuar për abuzim seksual me të mitur...
Edhe pse kanë kaluar 6 vjet nga vdekja e Jeffrey Epstein në një qeli burgu në Nju Jork, rrethanat e ngjarjes vazhdojnë të mbeten të paqarta. Një dokument federal, i dalë së fundmi në dritë nga arkivat e Departamentit Amerikan të Drejtësisë, ka rikthyer në qendër të vëmendjes çështjen, duke ngritur pyetje të reja mbi kronologjinë zyrtare të vdekjes së tij.
Dokumenti në fjalë njofton vdekjen e Epstein një ditë përpara kohës zyrtare kur ai u gjet i pajetë në qelinë e tij. Ky fakt ka nxitur dyshime dhe ka ringjallur diskutime mbi mënyrën se si u trajtua rasti nga autoritetet amerikane.
Sipas dokumentit, i cili mban datën 9 gusht 2019, Zyra e Prokurorit Federal për Distriktin Jugor të Nju Jorkut njoftonte se Epstein ishte gjetur pa ndjenja dhe se ishte konstatuar vdekja e tij. Kjo bie ndesh me të dhënat zyrtare të shërbimit korrektues dhe deklaratat publike të autoriteteve, sipas të cilave Epstein u gjet pa ndjenja në mëngjesin e së shtunës, 10 gusht 2019, nga një punonjës burgu që shpërndante mëngjesin në Metropolitan Correctional Center në Manhatan.
Çfarë thoshte deklarata zyrtare
Në dokument, prokurori federal i asaj kohe në Manhatan, Jeffrey S. Berman, deklaronte:
“Herët sot në mëngjes, Metropolitan Correctional Center konfirmoi se Jeffrey Epstein, i cili përballej me akuza të ngritura nga zyra jonë për trafikim seksual të të miturve, u gjet pa ndjenja në qelinë e tij dhe pak më vonë u konstatua vdekja e tij. Zhvillimet e sotme janë thellësisht shqetësuese dhe jemi të vetëdijshëm se mund të përbëjnë një pengesë tjetër në përpjekjen për të siguruar drejtësi për viktimat e shumta të tij. Për të gjitha gratë e reja që kanë folur dhe për ato që ende nuk e kanë bërë, dua të ritheksoj se ne mbetemi të përkushtuar në mbështetjen tuaj dhe hetimi ynë vazhdon.”
Megjithatë, kjo deklaratë nuk përputhet me kronologjinë zyrtare, sipas së cilës Epstein u gjet pa ndjenja pak pas orës 06:30 të mëngjesit të 10 gushtit. Pavarësisht përpjekjeve të ekipeve mjekësore, vdekja e tij u konstatua pak më vonë. Mjeku ligjor i qytetit të Nju Jorkut përfundoi se shkaku i vdekjes ishte vetëvrasja me varje.
Rasti dhe shkelja e protokolleve të sigurisë
Jeffrey Epstein, 66 vjeç, ndodhej në paraburgim që nga 6 korriku 2019, i akuzuar për shfrytëzim seksual të të miturve dhe komplot. Ai i kishte mohuar akuzat dhe priste gjykimin, kur u gjet i vdekur pak më shumë se një muaj pas arrestimit. Nëse shpallej fajtor, ai përballej me dënime që arrinin dhjetëra vite burg.
Vdekja e tij ndodhi në një kontekst shkeljesh serioze të protokolleve të sigurisë. Të dhënat e burgut treguan se rojet përgjegjëse për mbikëqyrjen e tij nuk kryen kontrollet e detyrueshme gjatë natës. Patrullimet e planifikuara rreth orës 03:00 dhe 05:00 nuk u realizuan. Po ashtu, kamerat e sigurisë pranë qelisë së tij nuk funksiononin siç duhet atë natë, duke krijuar boshllëqe të mëdha në monitorim.
Këto probleme ia pamundësuan hetuesve rindërtimin e plotë të minutave të fundit të jetës së Epstein. Deri më sot, ora e saktë e vdekjes së tij nuk është përcaktuar me siguri.
Dokumente të reja nga Departamenti i Drejtësisë
Sipas dokumenteve të reja të publikuara, hetues të FBI-së dhe të Shërbimit të Kontrollit të Brendshëm të Departamentit të Drejtësisë identifikuan pamje nga kamerat e sigurisë që tregonin një figurë të panjohur duke lëvizur drejt katit ku ndodhej qelia e Epstein.
Në pamje shfaqet një formë portokalli që ngjitet në një shkallë pranë sektorit të paraburgimit gjatë orëve të natës. Hetuesit e kanë regjistruar këtë lëvizje, pa arritur megjithatë në ndonjë përfundim publik nëse figura lidhej drejtpërdrejt me vdekjen e tij. Defektet e sistemit të mbikëqyrjes nuk lejuan krijimin e një pasqyre të plotë të ngjarjeve.
Një çështje e pambyllur
Vdekja e Epstein i dha fund papritur një prej çështjeve penale më të diskutuara në Shtetet e Bashkuara në dekadat e fundit. Prokurorët e akuzonin atë për ngritjen dhe drejtimin e një rrjeti ndërkombëtar të shfrytëzimit seksual të të miturve, me viktima që kishin denoncuar abuzime në disa shtete dhe vende.
Arrestimi i tij në verën e vitit 2019 erdhi pas vitesh kritikash për marrëveshjen e diskutueshme që ai kishte arritur në vitin 2008 në Florida, duke shmangur ndjekjen penale federale. Akuzat e reja në Nju Jork hapnin rrugën për dënime të rënda dhe për zbulime të mundshme që mund të përfshinin figura të fuqishme nga politika, ekonomia dhe shoqëria.
Megjithëse vdekja e tij mbylli procedurën penale ndaj Epstein, hetimet për bashkëpunëtorë të mundshëm vijojnë. Dokumentet e reja, me datën e diskutueshme dhe referencat e paqarta, tregojnë se çështja Epstein vazhdon të ngrejë më shumë pyetje sesa të japë përgjigje.
Daily Mail i është drejtuar Departamentit Amerikan të Drejtësisë për koment, por deri tani nuk ka pasur një përgjigje zyrtare. /Përshtatur nga Pamfleti/
Lini një Përgjigje