FLASH
Shkruar nga Pamfleti
NATO fortifikon krahun lindor, nis operacionin kundër dronëve rusë...
NATO ka ngritur alarmin më të madh të viteve të fundit në krahun lindore të saj, pas një vale të re provokimesh ajrore nga Rusia.
Sekretari i Përgjithshëm i Aleancës, Mark Rutte, deklaroi nga Brukseli se incidenti i 10 shtatorit, kur dhjetëra dronë rusë shkelën hapësirën ajrore të Polonisë, është “i rrezikshëm dhe i papranueshëm”, duke paralajmëruar se nuk bëhet fjalë për një rast të izoluar.
“Mbrojtjet tona ajrore reaguan me sukses, por kjo ishte shkelja më e madhe e hapësirës ajrore të NATO-s e regjistruar ndonjëherë. Dhe nuk është e vetmja. Rusia po bëhet gjithnjë e më e pamatur në qiellin e krahut tonë lindor. Kemi parë dronë rusë të hyjnë edhe në hapësirën ajrore të Rumanisë, Estonisë, Letonisë dhe Lituanisë. Qoftë me qëllim apo nga pakujdesia, kjo mbetet një akt i rrezikshëm dhe i papranueshëm”, theksoi Rutte.
Operacioni i ri: “Roja e Lindjes”
Për të përforcuar sigurinë e vendeve që ndodhen në vijën e parë përballë Rusisë, NATO ka shpallur nisjen e operacionit “Eastern Sentry” (Roja e Lindjes). Ky aktivitet ushtarak pritet të fillojë ditët në vijim dhe do të përfshijë një prani të gjerë të forcave aleate nga Danimarka, Franca, Britania e Madhe, Gjermania dhe vende të tjera të Aleancës.
Rutte theksoi se kjo nuk është thjesht një stërvitje e zakonshme, por një vendosje e re operacionale që do të kombinojë kapacitetet tradicionale ushtarake me teknologji moderne kundër dronëve.
“Eastern Sentry do t’i japë Aleancës më shumë fleksibilitet dhe forcë në krahin lindore. Mesazhi është i qartë: si një aleancë mbrojtëse, ne jemi gjithmonë të gatshëm të mbrojmë çdo centimetër të territorit tonë”, u shpreh kreu i NATO-s.
Muri anti-dron: një strategji e përbashkët BE–NATO
Paralelisht me masat e NATO-s, Komisioni Europian ka propozuar krijimin e një “muri anti-dron” përgjatë kufijve lindorë të BE-së. Iniciativa e presidentes Ursula von der Leyen u përshëndet nga komandanti suprem i Aleancës për Europën, gjenerali Alexus Grynkeëich, i cili e konsideroi këtë hap si plotësisht në përputhje me strategjinë mbrojtëse të NATO-s.
“Nga vizitat e mia në vendet Baltike, kam parë se shumë shtete po investojnë në sisteme të reja mbrojtjeje, duke mësuar nga përvoja e Ukrainës. Sensorët, armët kinetike dhe ato jo-kinetike janë thelbësore për të përballuar kërcënimin nga dronët. Integrimi i këtyre teknologjive në planet tona rajonale do të jetë i pashmangshëm”, deklaroi ai.
Një krah lindor i fortifikuar
Ngjarjet e fundit konfirmojnë se krahu lindor i NATO-s është sot linja më e nxehtë e sigurisë euroatlantike. Nga Balltiku deri në Detin e Zi, vendet kufitare me Rusinë dhe Bjellorusinë janë kthyer në pika kyçe për mbrojtjen e gjithë aleancës.
Me “Sentinella e Lindjes” dhe projektin e murit anti-dron, NATO dhe BE po synojnë të krijojnë një rrip të pakalueshëm sigurie, duke treguar se kostoja e çdo provokimi rus do të jetë gjithmonë më e lartë. /Pamfleti
Lini një Përgjigje