FLASH
Shkruar nga Pamfleti
Marina amerikane ka zhvilluar një operacion të gjerë në pjesën lindore të Oqeanit Paqësor, ku u sekuestruan mbi 34 tonë kokainë.
Operacioni përfshin 20 ndërhyrje detare, me një mesatare prej 820 kilogramë kokainë të sekuestruar çdo ditë, si dhe në arrestimin e 59 personave të dyshuar për trafik droge.
Departamenti Amerikan i Sigurisë Kombëtare e ka cilësuar këtë fushatë si një “goditje e vërtetë kundër karteleve”.
Politika e ashpër ndaj karteleve
Kjo ofensivë vjen në vazhdën e qasjes së ashpër të promovuar nga Donald Trump për të luftuar trafikun e drogës dhe krimin e organizuar. Nëndrejtori i Rojës Bregdetare, Jeffrey Novak, theksoi se “rezultatet e arritura me Operacionin Pacific Viper tregojnë përkushtimin tonë për të çmontuar organizatat kriminale dhe terroriste transnacionale.”
Fuqia dhe vendosmëria e operacionit tregojnë se Uashingtoni nuk po mjaftohet me frenimin e trafikut, por po avancon në neutralizimin e drejtpërdrejtë të grupeve narkoterroriste, përfshirë edhe organizatën e frikshme Tren de Aragua, anëtarë të së cilës janë vrarë në operacione të fundit ndaj mjeteve detare, që vinin nga Venezuela.
Nga Galapagos në Karaibe
Pamjet e publikuara nga Roja Bregdetare tregojnë sekuestrimin e 2500 kilogramëve kokainë në një mjet detar me “profil të ulët” në verilindje të Ishujve Galapagos më 10 shtator. Këto sekuestrime tregojnë për shtrirjen gjeografike të operacionit, i cili mbulon mijëra kilometra në det të hapur. Strategjia kombinon monitorimin satelitor, inteligjencën detare dhe bashkëpunimin ndërkombëtar, duke ndaluar skafe me shpejtësi të lartë, gjysmë-nëndetëse artizanale dhe anije të mbushura me drogë me destinacion tregun amerikan.
Bashkëpunim dhe vazhdimësi e ofensivës
Task Forca e Përbashkët Ndërinstitucionale Jug, me qendër në Florida, koordinon operacionet në bashkëpunim me Komandën Jugore të SHBA-së dhe me autoritetet policore dhe detare të vendeve partnere. Kjo strukturë bashkëpunimi ndërkombëtar forcon aftësinë e Shteteve të Bashkuara për të goditur rrugët e trafikut të drogës në korridorin detar që lidh Amerikën e Jugut me atë të Veriut. Zëdhënësit zyrtarë kanë konfirmuar se Operacioni Pacific Viper do të vijojë në mënyrë të vazhdueshme, me angazhim më të madh taktik dhe shkëmbim të zgjeruar informacioni për të neutralizuar rrugët e reja të përdorura nga kartelet.
Lini një Përgjigje