FLASH
Shkruar nga Pamfleti
Luftë me fitim: Si po u transferohen trilionë dollarë kompanive të armëve...
Një studim i ri mbi shpenzimet e Departamentit të Mbrojtjes, i paraqitur ekskluzivisht për “The Guardian”, tregon se shumica e shpenzimeve diskrecionare të Pentagonit nga viti 2020 deri në 2024 kanë shkuar për kontraktorë të jashtëm ushtarakë, duke krijuar një përfitim prej 2.4 trilionë dollarësh për kompanitë private, një “transferim i vazhdueshëm dhe masiv i pasurisë nga taksapaguesit për të financuar luftën dhe prodhimin e armëve”.
Raporti, i hartuar nga Quincy Institute for Responsible Statecraft dhe projekti “Costs of War” i Universitetit Brown, thekson se buxheti i ri i Pentagonit i propozuar nga administrata Trump do ta çojë shpenzimin ushtarak vjetor të SHBA-së përtej pragut të 1 trilion dollarëve.
Kjo do të sjellë një përfitim të projektuar prej më shumë se 500 miliardë dollarësh që do të shpërndahet mes gjigandëve të industrisë së armëve si Lockheed Martin dhe Raytheon, si dhe sektorit të teknologjisë ushtarake që ka lidhje të ngushta me administratën, përfshirë figura si JD Vance.
Raporti bazohet në statistikat e kontratave të Pentagonit nga 2020 deri në 2024, gjatë së cilës pesë kontraktorët kryesorë (Lockheed Martin, Raytheon, Boeing, General Dynamics dhe Northrop Grumman) kanë përfituar 771 miliardë dollarë në kontrata. Në total, kompanitë private kanë marrë rreth 54% të shpenzimeve diskrecionare prej 4.4 trilionë dollarësh të Departamentit të Mbrojtjes gjatë kësaj periudhe.
Duke përfshirë fondet shtesë të miratuara nga Kongresi në kuadër të ligjit të Trump “Një Paketë e Madhe dhe e Bukur”, raporti tregon se buxheti ushtarak i SHBA-së është pothuajse dyfishuar që nga viti 2000, me një rritje prej 99%.
Rritja e shpejtë e shpenzimeve ushtarake, që filloi pas 11 shtatorit gjatë administratës Bush, është vazhduar tashmë me përqendrimin tek Kina si rivali kryesor i SHBA-së në shekullin XXI, si dhe me shitjet rekord të armëve ndaj Izraelit dhe Ukrainës.
“Tërheqja e SHBA nga Afganistani në shtator 2021 nuk solli një ‘dividend paqeje’,” shkruajnë autorët e raportit. “Përkundrazi, Presidenti Biden kërkoi – dhe Kongresi autorizoi – buxhete akoma më të larta për Pentagonin, dhe Presidenti Trump po ndjek të njëjtën linjë të rritjes agresive të shpenzimeve ushtarake.”
Kjo bie në kundërshtim me deklaratat e Trump në shkurt, kur ai kishte sugjeruar se mund të përgjysmonte shpenzimet ushtarake, duke thënë: “Nuk ka arsye që të shpenzojmë gati 1 trilion dollarë për ushtrinë... dhe do të them që këto para mund t’i shpenzojmë për gjëra të tjera.” Megjithatë, ligji i buxhetit i shtyrë nga Trump në Kongres përfshinte një shtesë prej 157 miliardë dollarësh për Pentagonin.
Rritja e buxhetit pritet të përfitojë gjithnjë e më shumë sektori i teknologjisë ushtarake, me kompani si SpaceX, Palantir dhe Anduril që janë “thellësisht të integruara në administratën Trump”, sipas raportit – dhe që pritet të kenë avantazh në betejat e ardhshme për buxhetin.
“Buxhetet e larta të Pentagonit shpesh justifikohen si ndihmë për trupat,” tha William D. Hartung, studiues i lartë në Quincy Institute dhe bashkautor i raportit. “Por siç tregon ky raport, shumica e buxhetit shkon për korporatat – para që kanë më shumë lidhje me lobimin dhe interesat e veçanta sesa me një planifikim racional të mbrojtjes. Një pjesë e madhe e këtyre fondeve janë shpërdoruar në sisteme armësh të dështuara ose të mbivlerësuara dhe në paketa të ekzagjeruara shpërblimesh.”
“Këto shifra përfaqësojnë një transferim të vazhdueshëm dhe masiv të pasurisë nga taksapaguesit për të financuar luftën dhe prodhimin e armëve”, tha Stephanie Savell, drejtoreshë e projektit “Costs of War”.
Të llogaritura me inflacionin, shpenzimet ushtarake tejkalojnë shumë herë rreth 356 miliardë dollarët që Kongresi ka miratuar për diplomaci, zhvillim dhe ndihmë humanitare amerikane.
Ndërkohë, administrata Trump ka vazhduar të shkurtojë fondet për ndihmën ndërkombëtare. Muajin e kaluar, “The Guardian” zbuloi se një rishikim i financimeve nga Shtëpia e Bardhë rekomandonte thuajse shkurtim total të programeve për promovimin e demokracisë. /Përshtati “Pamfleti”
Lini një Përgjigje