FLASH
Shkruar nga Pamfleti
Pavarësisht tensioneve të vazhdueshme në Lindjen e Mesme, disa anije të mëdha tregtare kanë rifilluar kalimin përmes Ngushticës së Hormuzit, një nga rrugët më të rëndësishme të transportit detar në botë.
Sipas të dhënave të Marine Traffic, gjatë së dielës disa cisterna nafte, transportues të gazit të lëngshëm dhe një anije kontejnerësh hynë në Gjirin Persik duke ndjekur korridorin jugor pranë brigjeve të Omanit. Të gjitha anijet lundruan me sistemet e identifikimit aktivizuara, ndërsa rruga e zgjedhur i mbajti larg bregdetit iranian.
Megjithatë, jo të gjitha kompanitë detare kanë ndryshuar itinerarin. Sipas të dhënave të lundrimit, disa anije tregtare vijojnë të kalojnë përgjatë bregdetit të Iranit, pavarësisht situatës së tensionuar në rajon.
Ndërkohë, kompania franceze CMA CGM bëri të ditur se anija e saj e kontejnerëve Galapagos ka kaluar me sukses Ngushticën e Hormuzit. Kompania e cilësoi tranzitin si "një moment të rëndësishëm në një kontekst rajonal që mbetet kompleks dhe kërkon vigjilencë të vazhdueshme".
Sipas të dhënave të gjurmimit, anija lundroi mes ishujve iranianë Qeshm dhe Hormuz përpara se të largohej nga Gjiri.
Megjithëse trafiku po rikthehet gradualisht, autoritetet detare vijojnë të paralajmërojnë për rreziqe të larta. Qendra e Përbashkët e Informacionit Detar, e mbikëqyrur nga Marina amerikane, e ka klasifikuar nivelin e kërcënimit në Ngushticën e Hormuzit si "të konsiderueshëm", pas sulmeve të fundit ndaj anijeve tregtare.
Për të lehtësuar lundrimin, korridori jugor pranë brigjeve të Omanit është zgjeruar, duke krijuar më shumë hapësirë për qarkullimin e anijeve në të dy drejtimet, ndërsa monitorimi në zonë mbetet maksimal.
Lini një Përgjigje