FLASH
Shkruar nga Pamfleti
Marco Rubio po përpiqet të organizojë një përgjigje efektive ndaj katastrofës në një vend që administrata amerikane tashmë e konsideron aleat, pas rrëzimit të presidentit Nicolás Maduro nga SHBA-ja në janar.
Tërmetet e dyfishta që goditën këtë javë Venezuelën po konsiderohen si prova e parë serioze për epokën e re të fuqisë amerikane në hemisferën perëndimore, ndërsa administrata e presidentit Donald Trump po përpiqet të organizojë një mision efektiv të ndihmës ndaj një vendi që tashmë e cilëson aleat në Amerikën Latine, pasi një operacion i forcave speciale amerikane në janar rrëzoi nga pushteti liderin Nicolás Maduro.
Shtetet e Bashkuara po mobilizojnë atë që sekretari amerikan i Shtetit, Marco Rubio, e përshkroi si një përgjigje "të madhe, të shpejtë dhe efektive", duke angazhuar të gjitha institucionet shtetërore. Departamenti i Shtetit ka dërguar tre ekipe të specializuara të kërkim-shpëtimit urban dhe ka premtuar një fond ndihme prej 150 milionë dollarësh, një shumë që, sipas një ish-eksperti të ndihmës në raste katastrofash, është ndër më të mëdhatë që janë miratuar brenda 24 orëve nga një fatkeqësi.
Sipas një deklarate të Departamentit amerikan të Shtetit, ekipi i Ndihmës për Reagim ndaj Katastrofave (DART), i dislokuar në Venezuelë, përbëhet nga më shumë se 250 persona.
Ky mision konsiderohet me rëndësi të veçantë për Shtetet e Bashkuara. Administrata Trump ka reduktuar ndjeshëm Agjencinë Amerikane për Zhvillim Ndërkombëtar (USAID), duke transferuar përgjegjësinë për ndihmën në raste katastrofash te Departamenti i Shtetit dhe duke pushuar nga puna mijëra punonjës të ndihmës humanitare.
Po ashtu, më herët gjatë këtij viti, sipas këtij artikulli, Donald Trump urdhëroi kapjen e Nicolás Maduro në një operacion të forcave speciale dhe transferimin e tij në SHBA për t'u përballur me akuza federale për komplot në lidhje me narkoterrorizmin dhe vepra të tjera penale. Pasuesja e tij, Delcy Rodríguez, sipas artikullit, ka mbajtur një qëndrim shumë më bashkëpunues ndaj Uashingtonit.
"Ata u goditën nga një tërmet i tmerrshëm. Shumë njerëz humbën jetën në Karakas dhe ne kemi shumë njerëz atje që po ndihmojnë", deklaroi Trump të premten. Ai shtoi se marrëdhëniet mes SHBA-së dhe Venezuelës janë shumë të mira që nga kapja e Maduro.
"Kemi nxjerrë miliona fuçi naftë dhe kemi mbuluar shpenzimet e luftës shumë herë. Por po aq e rëndësishme është se ata po fitojnë më shumë para se kurrë më parë.
Përveç asaj që ndodhi mbrëmë, ishte një tërmet i madh që rrëzoi ndërtesa, por jashtë kësaj fatkeqësie vendi është sërish i lumtur. Njerëzit po kërcejnë nëpër rrugë", tha Trump.
Edhe pse SHBA-ja ka ndërhyrë më parë në fatkeqësi natyrore, si gjatë uraganit Melissa në Xhamajkë, shkalla e dëmeve të shkaktuara nga tërmetet në Venezuelë, ku kanë humbur jetën të paktën 920 persona, tejkalon çdo sfidë me të cilën është përballur deri tani kjo administratë.
"Ky është testi i tyre i parë i vërtetë, për shkak të përmasave të katastrofës", tha Susan Reichle, ish-këshilltare e USAID-it, e cila ka marrë pjesë në operacione të shumta të ndihmës, përfshirë edhe pas tërmetit të Haitit në vitin 2010.
"Ngjarja ndodh në hemisferën tonë dhe ka rëndësi të madhe për politikën e jashtme të presidentit Trump."
Nën administratën Trump, ndihma e huaj amerikane është rikonceptuar si një marrëdhënie që duhet të jetë me përfitim të ndërsjellë dhe jo një akt bamirësie. Për këtë arsye, janë reduktuar marrëveshjet dypalëshe për ndihmë dhe është tkurrur infrastruktura amerikane për ndihmën humanitare jashtë vendit, veçanërisht përmes shkurtimeve në USAID.
Sipas Reichle, zyra amerikane e ndihmës së huaj në Kolumbi kishte 144 punonjës përpara shkurtimeve në USAID, ndërsa tani ka vetëm 14, ndërkohë që janë ndërprerë edhe shumë bashkëpunime me organizata joqeveritare dhe kontraktorë lokalë.
"Nga ana pozitive, ata shpallën menjëherë gjendjen e katastrofës dhe aktivizuan ekipin DART, si edhe ekipet e kërkim-shpëtimit. 72 orët e para pas një tërmeti janë vendimtare për shpëtimin e të mbijetuarve", tha ajo.
Presidentja në detyrë e Venezuelës, Delcy Rodríguez, deklaroi të shtunën se dhjetëra persona janë nxjerrë të gjallë nga rrënojat.
"Kjo na sjell gëzim, sepse ata mund të përqafojnë sërish familjet dhe të dashurit e tyre," u shpreh ajo.
Qasja më pak ndërkombëtare e administratës amerikane në fushën e shëndetit publik ka sjellë edhe pasoja të tjera. Ekspertët e shëndetësisë kanë deklaruar se tërheqja e SHBA-së nga Organizata Botërore e Shëndetësisë shkaktoi një vonesë të konsiderueshme në marrjen e informacionit për shpërthimin e Ebolës në Republikën Demokratike të Kongos, deri në 10 ditë, gjë që ndikoi ndjeshëm në reagimin ndaj krizës.
Administrata Trump është kritikuar edhe më parë për mënyrën e reagimit ndaj fatkeqësive. Gjatë mandatit të tij të parë, Trump vizitoi Porto Rikon pas uraganit Maria dhe hodhi role letre higjienike drejt familjeve që jetonin pa ujë dhe energji elektrike, një veprim që kryetarja e bashkisë së San Juan e cilësoi si "të tmerrshëm dhe të neveritshëm".
Në rastin e Venezuelës, reagimi amerikan duket se është organizuar edhe për të shmangur kritikat që pritet të shoqërojnë këtë operacion.
"Ata e ndjejnë presionin dhe po angazhojnë të gjitha burimet në këtë emergjencë, me shpresën se do të arrijnë të ndihmojnë njerëzit që kanë nevojë urgjente", tha Sam Vigersky, bashkëpunëtor për çështjet ndërkombëtare në Këshillin për Marrëdhëniet me Jashtë (Council on Foreign Relations).
Më parë ai ka drejtuar ekipe amerikane të reagimit ndaj katastrofave në Afrikë dhe ka punuar në zyrën e USAID-it për ndihmën ndaj fatkeqësive ndërkombëtare.
Në analizën e tij, Vigersky krahasoi disa tregues kryesorë, përfshirë dërgimin e ekipit DART dhe ekipeve të kërkim-shpëtimit urban, duke vlerësuar se Departamenti amerikan i Shtetit po ecën në të njëjtin ritëm me reagimet amerikane pas tërmeteve në Turqi në vitin 2023 dhe në Haiti në vitin 2021.
Sipas tij, angazhimi prej 150 milionë dollarësh për Venezuelën është shuma më e madhe që ai ka parë të miratohet brenda 24 orëve të para pas një fatkeqësie natyrore.
"Sigurisht që ekziston edhe dimensioni politik i çështjes së Venezuelës. Ata kanë krijuar marrëdhënie me qeverinë e përkohshme dhe është në interesin e tyre që ajo të ketë sukses dhe të jetë e qëndrueshme," përfundoi Vigersky./Përshtati "Pamfleti", nga "The Guardian"
Lini një Përgjigje