FLASH
Shkruar nga Pamfleti
Ambasadori amerikan në NATO, Matthew Whitaker, deklaroi se administrata e Donald Trump pret nga aleatët plane të besueshme për rritjen e shpenzimeve ushtarake, ndërsa në samit do të diskutohen edhe mbështetja për Ukrainën dhe ndarja e barrës së sigurisë...
Shtetet e Bashkuara po rrisin presionin ndaj vendeve anëtare të NATO-s, duke kërkuar që ato të përshpejtojnë përmbushjen e objektivit të ri për të investuar 5% të Prodhimit të Brendshëm Bruto (PBB) në mbrojtje.
Ambasadori i SHBA-së në NATO, Matthew Whitaker, gjatë një konference për mediat, deklaroi se administrata e presidentit Donald Trump pret urgjencë dhe plane të besueshme nga vendet që ende nuk kanë arritur këtë objektiv. Sipas tij, Samiti i ardhshëm i NATO-s në Ankara do të shërbejë si tregues i zbatimit të vendimeve të marra në Samitin e Hagës në qershor 2025.
Whitaker theksoi se vlerësimi amerikan nuk do të bazohet vetëm te niveli i shpenzimeve, por edhe te aftësitë reale ushtarake që krijohen përmes këtyre investimeve. Sipas tij, që nga Samiti i Hagës, aleatët kanë angazhuar rreth 120 miliardë dollarë për mbrojtjen, ndërsa afërsisht gjysma e kësaj shume është përdorur për blerjen e pajisjeve ushtarake amerikane.
Vendet që udhëheqin dhe ato që mbeten pas
Sipas ambasadorit amerikan, Polonia, Gjermania, vendet baltike dhe shtetet nordike janë në krye të zbatimit të objektivave të rinj, ndërsa disa anëtarë të tjerë ende nuk kanë paraqitur plane të qarta për të arritur nivelin e 5% të PBB-së.
Whitaker përsëriti se Uashingtoni synon që vendet evropiane të marrin një rol më të madh në mbrojtjen konvencionale të kontinentit. Ai deklaroi se Shtetet e Bashkuara nuk mund të mbeten pafundësisht shtylla e vetme e Aleancës dhe la të kuptohet se vendet që kontribuojnë më shumë mund të kenë akses më të madh në vendimmarrjen politike dhe përparësi në programet e armatimit.
Në Samitin e Ankarasë pritet të diskutohen edhe masa të reja për mbështetjen e Ukrainës. Sipas Whitaker, SHBA-ja nuk planifikon të tërhiqet nga mbështetja për Kievin, por pret që vendet evropiane të marrin një pjesë më të madhe të përgjegjësisë, duke qenë se konflikti zhvillohet në territorin evropian.
Ai bëri të ditur se, përmes programit Priority Ukraine Requirements List (PURL), janë shitur sisteme amerikane të armatimit me vlerë mbi 6 miliardë dollarë, përfshirë sistemet e mbrojtjes ajrore Patriot dhe raketat PAC-3.
Lidhur me perspektivën e konfliktit, Whitaker deklaroi se presidenti Donald Trump synon arritjen e një marrëveshjeje paqeje, por theksoi se kjo kërkon pranimin e kushteve nga të dyja palët. Sipas tij, aktualisht as Moska dhe as Kievi nuk janë të gatshëm të bien dakord për një bazë të përbashkët negociatash, ndërsa Uashingtoni do të vazhdojë presionin diplomatik dhe angazhimet afatgjata për ta bindur Rusinë se lufta duhet të marrë fund.
Lini një Përgjigje