FLASH
Shkruar nga Pamfleti
Spanja nuk do të marrë pjesë në asnjë operacion ushtarak për sigurimin e Ngushticës së Hormuzit. Këtë qëndrim e konfirmuan ministrja e Mbrojtjes Margarita Robles dhe ministri i Jashtëm José Manuel Albares, të cilët e konsiderojnë luftën e SHBA-së dhe Izraelit kundër Iranit si të paligjshme.
Qeveria e koalicionit të majtë e drejtuar nga kryeministri Pedro Sánchez ka kritikuar hapur ofensivën dhe ka ndaluar gjithashtu avionët amerikanë që të përdorin bazat e përbashkëta ushtarake në jug të vendit.
Ministrja e Mbrojtjes Margarita Robles refuzoi kërkesën e presidentit amerikan Donald Trump për mbështetje ushtarake në sigurimin e kësaj rruge strategjike detare, e cila është bllokuar de facto për cisternat e naftës nga Irani.
“Spanja nuk do të pranojë kurrë masa të përkohshme, sepse objektivi duhet të jetë përfundimi i luftës, dhe që ajo të përfundojë tani”, deklaroi Robles.
Edhe ministri i Jashtëm José Manuel Albares theksoi se Bashkimi Europian duhet të fokusohet në uljen e tensioneve dhe jo në përshkallëzimin e konfliktit.
“Nuk duhet të bëjmë asgjë që do të shtonte edhe më shumë tensionin apo do ta përshkallëzonte më tej situatën”, u shpreh ai në një deklaratë për gazetarët në Bruksel.
Ndërkohë, edhe disa vende të tjera të Bashkimit Europian, përfshirë Gjermaninë, Italinë dhe Greqinë, kanë sinjalizuar se nuk do të marrin pjesë në operacionet ushtarake në Ngushticën e Hormuzit. Disa shtete të tjera, si Danimarka, nuk kanë marrë ende një vendim përfundimtar.
Lini një Përgjigje