FLASH
Shkruar nga PamfletiPas njoftimit për plagosjen e tre efektivëve, ministri i Brendshëm, Besford Lamallari, doli nga ambientet e Kryesisë së Kuvendit për të ndjekur nga afër gjendjen e policëve të lënduar.
Tensionet jashtë Kuvendit vijojnë të jenë të larta edhe para nisjes së seancës plenare. Protesta e organizuar përpara godinës së Parlamentit është shoqëruar me përplasje mes qytetarëve dhe forcave të policisë.
Me mbërritjen e deputetëve në Kuvend, një grup protestuesish hodhën vezë në drejtim të tyre. Situata u përshkallëzua menjëherë dhe policia ndërhyri për të neutralizuar incidentet, duke shoqëruar gjashtë protestues.
Gjatë përplasjeve mbetën të plagosur edhe tre efektivë të Policisë së Shtetit. Pas këtij momenti, protestuesit u zhvendosën drejt zonës së pedonales, ku tentuan të çajnë kordonin e sigurisë të ngritur nga forcat e rendit.
Për të penguar avancimin e turmës, policia përdori spraj lotsjellës. Përplasjet zgjatën për disa minuta, ndërsa forcat e rendit arritën të ruajnë perimetrin e sigurisë përreth Kuvendit.
Në hyrje të Parlamentit ndodhen në gatishmëri edhe dy automjete ujëhedhëse, të vendosura si masë parandaluese. Megjithatë, gjatë përplasjes së parë ato nuk u përdorën për shpërndarjen e protestuesve.
Pas njoftimit për plagosjen e tre efektivëve, ministri i Brendshëm, Besford Lamallari, doli nga ambientet e Kryesisë së Kuvendit për të ndjekur nga afër gjendjen e policëve të lënduar.
Nga përplasjet kanë mbetur të plagosur edhe tre protestues të cilët janë transportuar me ambulancë për të marrë trajtim mjekësor.
Situata në zonën përreth Parlamentit mbetet nën monitorimin e forcave të policisë, ndërsa protesta vijon paralelisht me zhvillimin e seancës plenare.
Lini një Përgjigje