FLASH
Shkruar nga Pamfleti
Qytetarët vijojnë të marshojnë në rrugët e kryeqytetit, ndërsa protesta e ditës së dhjetë nuk tregon shenja lodhjeje. Bori makinash, flamuj kuqezi dhe thirrje për “Shqipëri të Re” kanë pushtuar Tiranën.
Prej më shumë se pesë orësh, Tirana vazhdon të jetë nën ritmin e protestës qytetare, ndërsa mijëra protestues vijojnë marshimin në rrugët e kryeqytetit pa shenja tërheqjeje.
Pas grumbullimit fillestar në Sheshin Skënderbej dhe tubimit para Kryeministrisë, protesta është shpërndarë në disa drejtime, me grupe qytetarësh që po përshkojnë akse të ndryshme të Tiranës. Për orë me radhë, rrugët kryesore dhe lagjet e kryeqytetit janë mbushur me flamuj kuqezi, brohoritje dhe slogane kundër qeverisë dhe klasës politike.
“Rama ik”, “Berisha në burg”, “Shqipëri e Re”, “Duam drejtësi”, “Atdheu nuk shitet” dhe “Revolucion” janë thirrjet që dëgjohen vazhdimisht nga grupet e protestuesve, të cilët lëvizin në kolona të ndara, duke prekur pothuajse çdo pjesë të qytetit.
Atmosfera e protestës nuk kufizohet vetëm te pjesëmarrësit në marshim. Në shumë segmente të itinerarit, qytetarë që ndodhen në trotuare, në lokale apo në ballkonet e banesave përshëndesin protestuesit, ndërsa drejtues automjetesh u bien vazhdimisht borive në shenjë mbështetjeje.
Në disa zona, zhurma e borive është bashkuar me brohoritjet e turmës, duke krijuar pamjen e një kryeqyteti që prej orësh po jeton nën ritmin e protestës.
Një nga elementët që ka spikatur edhe sot është pjesëmarrja e madhe e të rinjve. Studentë, familje, profesionistë dhe qytetarë të moshave të ndryshme vijojnë të marshojnë së bashku, duke e kthyer protestën në një nga mobilizimet më të gjata dhe më të qëndrueshme të ditëve të fundit.
Ndërsa mbrëmja avancon, protestuesit vazhdojnë të lëvizin nëpër rrugët e Tiranës, pa dhënë sinjale se marshimi po i afrohet fundit.
Pesë orë pas nisjes së saj, protesta vijon të mbajë të ndezur kryeqytetin. Tirana gumëzhin nga thirrjet, flamujt dhe kolonat e qytetarëve që kërkojnë ndryshim, ndërsa marshimi vazhdon ende në disa prej akseve kryesore të qytetit.
Lini një Përgjigje