FLASH
Shkruar nga Pamfleti
Lexues të “Pamfleti” ju ftojmë të ndiqni edicionin informativ të mesditës, ku mes të tjerash veçojmë:
Gjykata e Lartë shqyrton sot rekursin
A do të lirohet kryebashkiaku Veliaj nga qelia?
Gjykata e Lartë pritet të shqyrtojë këtë të enjte rekursin e paraqitur nga kryebashkiaku i Tiranës, Erion Veliaj, i cili kërkon ndryshimin e masës së sigurisë “arrest me burg” në një masë më të lehtë.
Paralelisht me këtë proces, Gjykata Kushtetuese ka rikthyer për rishqyrtim në Gjykatën e Lartë një tjetër kërkesë të Veliajt për liri. Kushtetuesja ka kërkuar që në vendimin e ri të argumentohet nëse masa e arrestit me burg është proporcionale me funksionin publik që ai ushtron si kryebashkiak i Tiranës.
Në fokus të shqyrtimit do të jetë edhe balanca mes masës së sigurisë dhe të drejtës së Veliajt për të ushtruar mandatin e fituar përmes votës. Gjykata e Lartë duhet të japë argumente konkrete se përse nuk duhet të prevalojë e drejta për t’u zgjedhur dhe për të ushtruar detyrën si kryebashkiak, përballë një mase kaq kufizuese.
Pas rikthimit të çështjes në duart e saj, trupa gjykuese duhet të argumentojë gjithashtu pse masat alternative të sigurisë nuk konsiderohen të mjaftueshme në rastin konkret. Kjo kërkesë mbështetet edhe në vendimin unifikues të vetë Gjykatës së Lartë të datës 4 maj, lidhur me praktikën e masave të arrestit.
Erion Veliaj ndodhet në arrest me burg prej 10 shkurtit 2025. Ndërkohë, SPAK ka dërguar prej pesë muajsh kërkesën për kalimin e dosjes në gjykim. Prokuroria e Posaçme ka ngritur ndaj tij 13 akuza, mes tyre korrupsion pasiv, pastrim parash, mosdeklarim pasurie, shpërdorim detyre dhe futje të sendeve të ndaluara në burg.
“Këtu të ha miu”
Korreshi publikon pamjet skandaloze nga spitali i Lushnjes
Deputeti demokrat i Qarkut të Fierit, Saimir Korreshi, ka publikuar të tjera pamje skandaloze, nga spitali i Lushnjes, për të cilin prej ditësh po i kërkon Ministrisë së Shëndetësisë që të ndërhyjë, pasi çdo ditë rrezikohet të humben jetë njerëzish.
Më konkretisht, ditën e sotme, Korreshi ka publikuar pamje nga Qendra e Gjakut, ku shfaqet një godinë tërësisht e amortizuar, me kushte të mjerueshme, ndërsa atje marrin gjak të sëmurët me talasemi.
“Këtu jemi te Banka e Gjakut, një nga repartet më të rëndësishme. Shikoje pak këtë lagështinë! E kuptoni se si është situata këtu. E shikoni ça thotë aty; Qendra Rajonale. Të sëmurët me talasemi janë të shumtë në Lushnjë. Ata detyrohen çdo 3 muaj që të udhëtojnë drejt Tiranës për të dalë në komision për ilaçet. Le që këtu nuk ka gjak, por shiko si ka vajtur bari. A të hanë minjtë këtu?! Kjo është situata e Bankës së Gjakut!”, thotë Korreshi.
Më herët deputeti demokrat ka publikuar pamje edhe nga repartet e tjera të Spitalit të Lushnjes, ndërsa një fjalim i tij në Kuvend lidhur me gjendjen ku ndodhet shëndetësia shqiptare u bë viral në rrjetet sociale, teksa evidentoheshin një seri problematikash që nga mosfunksionimi i urgjencave dhe deri në mungesën e kushteve të domosdoshme në spitale.
Aksidenti tragjik në Mengël
Prokuroria kërkon “arrest në burg” për regjisorin Petri Bozo
Në Gjykatën e Shkallës së Parë të Juridiksionit të Përgjithshëm Elbasan po zhvillohet me dyer të mbyllura seanca për vlerësimin e ligjshmërisë së ndalimit dhe caktimin e masës së sigurimit ndaj shtetasit Petri Bozo, i cili është nën hetim për aksidentin tragjik ku humbi jetën 7-vjeçari me inicialet E.S. Ngjarja ndodhi në fshatin Mengël të Elbasanit.
Prokuroria përfaqësohet në seancë nga prokurori Adnand Hoxha, i cili i ka kërkuar gjykatës që ndalimi i personit nën hetim të konsiderohet i ligjshëm dhe ndaj tij të caktohet masa e sigurimit personal “Arrest në burg”, në bazë të nenit 238 të Kodit të Procedurës Penale.
Sipas organit të akuzës, ekzistojnë dyshime të arsyeshme që lidhin Petri Bozon me aksidentin fatal që tronditi opinionin publik në Elbasan dhe më gjerë, ku humbi jetën një fëmijë 7 vjeç.
Ngjarja ka sjellë reagime të shumta nga komuniteti elbasanas dhe ka rikthyer vëmendjen te problematika e sigurisë rrugore në zonën e Menglit, si edhe te respektimi i rregullave të qarkullimit.
Gjatë seancës janë paraqitur argumentet e palëve, ndërsa gjykata po shqyrton provat dhe rrethanat paraprake të çështjes për të marrë një vendim mbi kërkesën e Prokurorisë.
Në përfundim të seancës pritet që gjykata të shpallë vendimin për masën e sigurisë ndaj Petri Bozos, duke përcaktuar nëse do të pranojë kërkesën për “Arrest në burg” apo do të vendosë një masë tjetër sigurimi.
Produktet e skaduara të “Big Market”
“Tirana Cash& Carry” baza e furnizimit dhe falsifikimit
Prej shumë vitesh, rrjeti "Big Market" i deputetit socialist Vullnet Sinaj tregton produkte të skaduara dhe me risk për shëndetin e qytetarëve, për të cilat është ndëshkuar disa herë me gjoba e konfiskime nga Autoriteti Kombëtar i Ushqimit dhe agjencitë e shëndetit publik.
Lidhja me pushtetin dhe privilegji si sponsor i PS-së jo vetëm nuk ka ndaluar pronarin e "Big Market", Vullnet Sinaj, të shesë produkte të skaduara e të rrezikshme, por qysh prej vitit 2017, kur u bë deputet, institucionet e sigurisë ushqimore po e lejojnë të kryejë edhe krim ushqimor.
Sipas raporteve të Antikrimit, magazinat e firmës "Tirana Cash&Carry" sh.p.k. janë baza e grumbullimit, falsifikimit dhe shpërndarjes në dyqanet "Big Market" të ushqimeve dhe produkteve të skaduara, pa vlerë ushqyese, pa origjinë prodhimi dhe me marka të falsifikuara, sikur gjoja janë produkte të importuara nga kompanitë e njohura në vendet e BE-së.
Firma "Tirana Cash&Carry" sh.p.k. u krijua në muajin prill 2006 nga Vullnet Sinaj me 51% aksione, Albert Janina me 39% dhe Edmond Gjikoka me 10%; ndërsa më 9 qershor 2008 dhe më 9 korrik 2009, këta ia shitën aksionet Vullnet Sinajt.
Magazinat e firmës "Tirana Cash&Carry" janë në fshatin Gropaj të Njësisë Administrative Vaqarr, ku mblidhen produkte që sillen nga importi, nga fabrika e prodhues ilegalë brenda vendit, dhe dërgohen në dyqanet "Big Market".
Për më shumë, klikoni në linkun e lajmeve të orës 12.00
Lini një Përgjigje