FLASH
Shkruar nga Pamfleti
Irani ka ashpërsuar tonet ndaj Agjencisë Ndërkombëtare të Energjisë Atomike (IAEA), duke e akuzuar atë se po përdor raportet mbi programin bërthamor iranian si instrument presioni politik në mes të tensioneve të vazhdueshme me Shtetet e Bashkuara.
Zëvendësministri i Jashtëm iranian, Kazem Gharibabadi, deklaroi se organi mbikëqyrës bërthamor i OKB-së duhet të rishikojë qasjen e tij ndaj monitorimit të aktiviteteve bërthamore të Iranit, nëse synon të luajë një rol konstruktiv në arritjen e një zgjidhjeje diplomatike.
“IAEA po përdor raportet e saj si mjete presioni politik”, tha zv. ministri i Jashtëm iranian, Kazem Gharibabadi, duke akuzuar organin mbikëqyrës bërthamor të OKB-së për një qasje të politizuar ndaj programit bërthamor të Teheranit.
Deklaratat vijnë në një moment kur programi bërthamor iranian mbetet një nga çështjet më të debatueshme në diskutimet ndërkombëtare. Uashingtoni ka kërkuar vazhdimisht që Teherani të dorëzojë rezervat e uraniumit të pasuruar, të cilat konsiderohen një pikë kyçe në negociatat për sigurinë rajonale.
Në raportin e saj më të fundit, IAEA i kërkoi Iranit të japë sqarime mbi fatin e rezervave të uraniumit, të cilat sipas agjencisë nuk janë lokalizuar që prej sulmeve të ndërmarra nga SHBA-ja dhe Izraeli ndaj objektivave iraniane gjatë verës së kaluar.
Sipas zyrtarëve të IAEA-së, inspektorët ndërkombëtarë nuk kanë mundur të rikthehen në disa prej objekteve bërthamore për të kryer verifikimet e nevojshme. Megjithatë, Gharibabadi argumentoi se kjo situatë është pasojë direkte e sulmeve ushtarake dhe jo e mungesës së bashkëpunimit nga ana e Iranit.
Teherani vijon të këmbëngulë se programi i tij bërthamor ka ekskluzivisht qëllime civile dhe energjetike, duke mohuar akuzat se synon zhvillimin e armëve bërthamore.
Lini një Përgjigje