FLASH
Shkruar nga Pamfleti
Ministri i Jashtëm i Polonisë, Radosław Sikorski, ka paralajmëruar presidentin rus Vladimir Putin, duke deklaruar se vendet perëndimore janë të vetëdijshme për veprimet e Moskës dhe se nuk do të lejojnë përshkallëzim të mëtejshëm.
Sikorski tha se Rusia ka zhvilluar prej vitesh një fushatë të gjerë lufte hibride kundër vendeve evropiane.
"Rusia ka zhvilluar luftë hibride kundër nesh për vite me radhë. Perëndimi nuk e ka njohur këtë, mendoj se tani të gjithë e njohim. Janë zjarrvënie, janë vrasje, është ndërhyrje në politikën tonë, është dezinformim masiv dhe terrorizëm shtetëror", u shpreh ai për "CNN".
Sipas ministrit polak, këto veprime përbëjnë një kërcënim të vazhdueshëm për sigurinë e Evropës dhe kërkojnë një përgjigje të bashkërenduar nga aleatët e NATO-s.
CNN kujton se Polonia është paralajmëruar më herët nga Shtetet e Bashkuara se presidenti rus Vladimir Putin mund të urdhërojë sulme të kufizuara ndaj Evropës, përmes dronëve ose formave të tjera të luftës hibride.
Në këtë kontekst, Sikorski i dërgoi një mesazh të drejtpërdrejtë Kremlinit.
"Çfarëdo që të jetë, mesazhi ynë për Vladimir Putinin është: ne e dimë se çfarë po bën, mos e bëj", deklaroi ai.
Në një tjetër deklaratë, Sikorski u shpreh edhe për ecurinë e luftës në Ukrainë, duke vlerësuar se Rusia nuk po arrin objektivat e saj ushtarake.
"Është e qartë se ai nuk po fiton", tha ministri polak, duke iu referuar presidentit rus Vladimir Putin.
Lini një Përgjigje