FLASH
Shkruar nga Pamfleti
Irani ka nisur sulmet ndaj disa bazave ushtarake që strehojnë forca amerikane në Lindjen e Mesme, në përgjigje të goditjeve amerikane në të paktën tre rajone të Republikës Islamike.
Sipas Gardës Revolucionare Islamike të Iranit (IRGC), Forcat Ajrore kanë lëshuar raketa me rreze të gjatë dhe me lëndë djegëse të ngurtë drejt një baze ajrore në Jordani, ku ndodhen personel ushtarak amerikan. IRGC pretendon se raketat kanë goditur dhe shkatërruar katër objektiva kyç brenda bazës, përfshirë hangarë të avionëve luftarakë F-35 dhe një qendër kryesore komandimi dhe kontrolli. Po ashtu, sipas deklaratës iraniane, janë sulmuar edhe Flota e Pestë e SHBA-ve në Bahrein dhe baza “Ali Al Salem” në Kuvajt.
Autoritetet atje kanë njoftuar se sistemet e mbrojtjes ajrore janë aktualisht duke interceptuar objektiva ajrore “armiqësore”, ndërsa ushtria e Kuvajtit është vendosur në gatishmëri të lartë.
Edhe Bahreini ka konfirmuar se janë regjistruar sulme dhe u ka bërë thirrje qytetarëve të strehohen në vende të sigurta. Ndërkohë, Jordania ende nuk ka dhënë një konfirmim zyrtar për ngjarjet. Sulmet vijnë si përgjigje ndaj goditjeve të ushtrisë amerikane ndaj sistemeve të mbrojtjes ajrore dhe radarëve në Bandar Abbas, Sirik, Jask dhe ishullin Qeshm, pas rrëzimit të dyshuar të një helikopteri Apache amerikan në Ngushticën e Hormuzit.
Shtetet e Bashkuara nisën të martën sulme kundër Iranit pasi Presidenti Donald Trump deklaroi se Teherani kishte rrëzuar një helikopter amerikan Apache në Ngushticën e Hormuzit, duke thelluar dyshimet mbi perspektivën e paqes mes dy vendeve.
“Ata rrëzuan një helikopter dhe ne po përgjigjemi në këtë moment,” tha Trump për ABC News. Trump kishte deklaruar më herët se dy pilotët amerikanë të përfshirë në incident nuk kishin pësuar lëndime.
Sipas një zyrtari amerikan që foli në kushte anonimiteti, helikopteri Apache u rrëzua nga një dron iranian sulmues njëdrejtimësh.Ministri i Jashtëm i Iranit, Abbas Araqchi, nuk iu referua drejtpërdrejt incidentit me helikopterin, por tha se forcat e huaja në rajon rrezikojnë të përfshihen në aksidente ose të goditen.
“Për të ulur rrezikun, zgjidhja më e mirë është që ata të largohen.” shkroi ai në rrjetet sociale.
Më vonë, mediat shtetërore iraniane cituan një burim ushtarak që tha se gjatë 24 orëve të fundit nuk është kryer asnjë operacion ajror ushtarak ofensiv në Ngushticën e Hormuzit.
Lini një Përgjigje