FLASH
Shkruar nga Pamfleti
Çmimi i naftës në tregjet ndërkombëtare ka shënuar një rritje të ndjeshme, duke kaluar mbi 106 dollarë për fuçi, në një kohë kur tensionet mes Shteteve të Bashkuara dhe Iranit janë përshkallëzuar në Ngushticën e Hormuzit.
Kjo ngushticë, një nga korridoret më strategjike për transportin e energjisë në botë, ndodhet aktualisht në një situatë bllokimi të pjesshëm, pas një sërë incidentesh që përfshijnë përplasje dhe sekuestrime të anijeve tregtare nga të dyja palët.
Nafta Brent, referencë kryesore globale, është rritur me rreth 5% që nga dita e mërkurë, duke kaluar për herë të parë në dy javët e fundit pragun prej 100 dollarësh për fuçi. Të premten në mëngjes, çmimi arriti në 106.80 dollarë për fuçi.
Rritja e çmimeve të energjisë ka ndikuar negativisht edhe në tregjet financiare amerikane. Indeksi S&P 500 ka pësuar një rënie prej 0.41%, ndërsa Nasdaq ka rënë me 0.89%, duke reflektuar pasigurinë e krijuar nga zhvillimet e fundit në sektorin energjetik.
Ngushtica e Hormuzit përbën një arterie jetike për furnizimin global me energji, pasi përmes saj kalon rreth një e pesta e naftës dhe gazit natyror në nivel botëror. Situata aktuale ka rritur shqetësimet për ndërprerje të mundshme të furnizimit.
Tensionet janë intensifikuar më tej pas deklaratave të forta nga presidenti amerikan, Donald Trump, i cili në një postim në platformën Truth Social ka paralajmëruar se marina amerikane është urdhëruar të shkatërrojë çdo anije iraniane që vendos mina në këtë zonë. Kjo deklaratë erdhi pas njoftimeve të Pentagonit për kapjen e një anijeje që transportonte naftë iraniane në kundërshtim me sanksionet.
Nga ana tjetër, Irani ka shtuar praninë dhe veprimet në zonë. Garda Revolucionare Islamike ka njoftuar se ka ndaluar dy anije të huaja, “MSC Francesca” me flamur panamez dhe “Epaminondas” me flamur grek. Sipas autoriteteve iraniane, këto anije dyshohet se kanë shkelur rregullat e sigurisë detare duke operuar pa leje dhe duke manipuluar sistemet e navigimit.
Lini një Përgjigje