FLASH
Shkruar nga Pamfleti
Kryeministri Edi Rama prezantoi të premten programin "Rilindja Urbane 2.0", i cili parashikon investime në vlerën e 1.5 miliardë eurove. Sipas tij, iniciativa e re pasqyron nevojat që kanë lindur pas ndryshimeve ekonomike dhe sociale të viteve të fundit.
Gjatë prezantimit, Rama tha se përmirësimi i kushteve të jetesës ka rritur edhe kërkesat e qytetarëve për shërbime dhe hapësira publike me standarde më të larta.
Në këtë kuadër, kryeministri u shpreh se investimet në rrugë dhe infrastrukturë nuk përbëjnë më elementin kryesor të garës politike, duke shtuar se pritshmëritë e qytetarëve kanë ndryshuar bashkë me zhvillimin e vendit.
“Sot zgjedhjet nuk fitohen me asfalt dhe çakull”, u shpreh kryeministri, duke nënvizuar se zhvillimi i deritanishëm kërkon tashmë politika dhe investime që shkojnë përtej infrastrukturës bazë.
Rama argumentoi se përmirësimi i kushteve e bën më të dukshëm çdo problem të pazgjidhur dhe se kjo, sipas tij, lidhet me rritjen e standardeve që kërkojnë qytetarët, jo me mungesë vlerësimi për investimet e kryera.
Në fund, ai rikujtoi deklaratën e bërë pas zgjedhjeve të fundit, kur e cilësoi rezultatin elektoral si njëkohësisht "bekim" dhe "mallkim", duke thënë se mbështetja e marrë e vendos qeverinë përballë përgjegjësive dhe pritshmërive edhe më të mëdha.
Mjaft me cimento Rame shkaterrove cdo gje..na qelbe 20 vite me shkaterrime..