FLASH
Shkruar nga Pamfleti
Lionel Messi e përshkroi si një fitore të veçantë triumfin 2-1 ndaj Anglisë në gjysmëfinalen e Kupës së Botës, rezultat që i siguroi Argjentinës kualifikimin në finalen e dytë radhazi të turneut.
I shpallur lojtari më i mirë i ndeshjes, kapiteni argjentinas theksoi rëndësinë e suksesit, duke nënvizuar peshën që kanë gjithmonë përballjet me Anglinë.
“Është e pabesueshme. Ishte një ditë fantastike. Edhe pse është vetëm një ndeshje futbolli, përballjet me Anglinë janë gjithmonë të veçanta për atë që përfaqësojnë, aq më tepër kur bëhet fjalë për një gjysmëfinale Botërori. Donim t’u dhuronim këtë gëzim tifozëve tanë dhe të siguronim finalen”, tha Messi.
Më tej, 38-vjeçari vlerësoi paraqitjen e skuadrës dhe shpirtin e grupit, duke theksuar se Argjentina dëshmoi edhe një herë forcën dhe unitetin e saj.
“Është e jashtëzakonshme ajo që ka bërë ky grup. Edhe sot treguam karakter, dëshirë, unitet, forcë dhe futboll. E kërkuam fitoren me lojë dhe me durim”, u shpreh ai.
Në finalen e madhe, Argjentina do të masë forcat me Spanjën, një kundërshtar që Messi e njeh mirë nga periudha e gjatë te Barcelona. Kapiteni argjentinas vlerësoi cilësitë e rivalëve dhe parashikoi një duel të fortë.
“Spanja është një kombëtare e madhe, me lojtarë të shkëlqyer dhe një stil loje të konsoliduar prej shumë vitesh. I njoh shumë mirë lojtarët dhe filozofinë e tyre. Do të jetë një ndeshje shumë e veçantë dhe e ekuilibruar”, përfundoi Messi.
Lini një Përgjigje