FLASH
Shkruar nga Pamfleti
Pavarësisht eliminimit në gjysmëfinalen e Kupës së Botës ndaj Argjentinës, Tomas Tuhel do të vazhdojë të jetë trajneri i Anglisë. Tekniku gjerman ka konfirmuar se do të respektojë kontratën e tij me “Tre Luanët”, e cila skadon pas Kampionatit Evropian të vitit 2028.
Në një deklaratë për "Sky Sports UK", Tuhel tha: “Ne do të vazhdojmë përpara. Kontrata ime është deri në Evropianin e 2028. Në këtë moment është e vështirë të shohësh kaq larg, por mezi pres.”
Megjithatë, përpara se të mendojë për turnetë e ardhshëm, Anglia duhet të mbyllë aventurën e saj në Botëror me ndeshjen për vendin e tretë ndaj Francës. Por në ishull, shumë tifozë dhe ish-futbollistë kishin nisur të kërkonin fundin e epokës së Tuhel-it, i cili ishte kritikuar edhe para fillimit të turneut.
Humbja ndaj Argjentinës dhe Lionel Mesit ka rikthyer debatet e vjetra në futbollin anglez. Shumë kanë krahasuar qasjen taktike të Tuhel-it me atë të epokës së Garet Sauthgejt, duke e akuzuar trajnerin gjerman për një lojë tepër konservatore dhe për mungesë guximi në momentet vendimtare.
Ish-mbrojtësi i Anglisë, Geri Nevil, ishte ndër kritikët më të ashpër:
“Dukej si finalja e Evropianit kundër Italisë. Është një çështje mentaliteti, besimi dhe aftësie për të menaxhuar mbajtjen e topit. Është e pabesueshme se si kjo histori vazhdon të përsëritet.”
Edhe ish-kapiteni i Anglisë, Uejn Runi, kritikoi vendimet taktike të trajnerit gjerman:
“Vendimet e Tuhel na kushtuan shumë shtrenjtë. Nëse je sulmues dhe sheh mbrojtësit të futen në fushë pasi je në avantazh, e humbet besimin. Ai u kap nga paniku duke hequr dorë nga mundësia për të dyfishuar rezultatin. Nëse i jep Argjentinës iniciativën pranë zonës tënde, herët a vonë do të ndëshkohesh.”
Në të njëjtën linjë ishte edhe Majkëll Ouen, i cili krahasoi Anglinë me Spanjën:
“Shikoni Spanjën kundër Francës. Kur ishte në avantazh 1-0, vazhdoi të luante me guxim. Ne, në të njëjtën situatë, futëm tre mbrojtës. Çfarë mesazhi i dërgon ekipit në këtë mënyrë? E meritonim humbjen, mund të kishte përfunduar edhe 4-1.”
Kritika të forta erdhën edhe nga Geri Lineker, i cili nuk i kurseu komentet për planin e lojës së Tuhel-it:
“Një plan loje shokues dhe një menaxhim i paimagjinueshëm ndaj Mesit, i cili u la i lirë të krosonte vazhdimisht. Pyes veten me ironi nëse Tuhel nuk është ndonjë spiun i dërguar nga Gjermania për të na sabotuar, duke qenë se atyre nuk po u ecën aq mirë për momentin.”
Edhe ish-portieri i Anglisë, Xho Hart, theksoi se problemet e së kaluarës duket se janë rikthyer:
“Të gjithë e kritikonin Sauthgejt për menaxhimin e momenteve kyçe, por me Tuhel nuk ka ndryshuar asgjë.”
Ndërsa Xhimi Karager e përmblodhi zhgënjimin e tij me fjalët:
“Anglia e dominoi Argjentinën për 72 minuta para se të vetëshkatërrohej.”
Pavarësisht valës së kritikave, Federata Angleze e Futbollit (FA) vazhdon t’i japë mbështetje të plotë Tomas Tuhel-it. Drejtori i Përgjithshëm i FA-së, Mark Bulingam, i cili i zgjati kontratën trajnerit gjerman deri në "EURO 2028", nuk ka ndërmend të ndryshojë drejtimin e projektit teknik.
Vetë Tuhel e përjashtoi mundësinë e dorëheqjes pas eliminimit, ndërsa mbështetje për të dhe skuadrën kanë ardhur edhe nga institucionet më të larta të vendit. Princi Uilliam u shpreh se ishte “i shkatërruar” nga eliminimi, por njëkohësisht “krenar” për paraqitjen e ekipit.
Edhe kryeministri në largim i Britanisë, Keir Starmer, vlerësoi përkushtimin e skuadrës, duke thënë se mënyra me të cilën lojtarët përfaqësuan Anglinë i bëri të gjithë krenarë.
Pavarësisht zhgënjimit të madh, drejtuesit anglezë duket se kanë vendosur të vazhdojnë rrugëtimin me Tuhel-in, me objektivin kryesor: një paraqitje triumfuese në "EURO 2028", turne që do të zhvillohet në shtëpinë e “Tre Luanëve”.
Lini një Përgjigje