FLASH
Shkruar nga Pamfleti
Cristiano Ronaldo dhe Lamine Yamal pritet të jenë në qendër të vëmendjes në përballjen që rikthen rivalitetin e zjarrtë mes dy fuqive të futbollit evropian…
Spanja dhe Portugalia do të rikthejnë të hënën një nga rivalitetet më të forta të futbollit ndërkombëtar, kur të përballen në fazën e 1/8-ave të Kupës së Botës. Sfida vendos përballë veteranin Cristiano Ronaldo dhe talentin Lamine Yamal, në një ndeshje që njëkohësisht shërben si revansh i finales së Ligës së Kombeve të vitit të kaluar.
Portugalia fitoi atë finale pas ekzekutimit të penalltive, pasi koha e rregullt dhe shtesa përfunduan 2-2. Me atë sukses, portugezët i mohuan Spanjës mbrojtjen e trofeut dhe shtimin e një tjetër titulli pas triumfit në Kampionatin Evropian.
Për ekipin e drejtuar nga Luis de la Fuente, ajo humbje mbetet njolla e vetme në një periudhë trevjeçare shumë të suksesshme, gjatë së cilës Spanja ka regjistruar 34 ndeshje pa humbje.
Spanjollët kanë spikatur për kontrollin e topit, qarkullimin e shpejtë të lojës, efikasitetin në sulm dhe organizimin në mbrojtje. Ata nuk kanë pësuar asnjë gol në Kupën e Botës që nga ndeshja e fazës së grupeve ndaj Japonisë në Katar 2022.
Megjithatë, Portugalia paraqet një provë të vështirë. Mesfusha e përbërë nga Vitinha, Joao Neves dhe Bruno Fernandes konsiderohet e aftë të rivalizojë me cilësinë teknike të spanjollëve.
Në finalen e Ligës së Kombeve, Portugalia zgjodhi një qasje pragmatike, duke mbrojtur me disiplinë dhe duke kufizuar hapësirat, në vend që të përpiqej të dominonte zotërimin e topit. Një nga protagonistët ishte Nuno Mendes, i cili fitoi disa duele të rëndësishme në krahun e majtë dhe kontribuoi edhe në fazën sulmuese.
Edhe këtë herë, mbrojtësi i Paris Saint-Germain pritet të ketë një rol kyç, me detyrën për të neutralizuar Lamine Yamal dhe për të mbështetur sulmet e Portugalisë sa herë që krijohet mundësia.
Yamal mbetet figura më e spikatur e Spanjës. Pavarësisht moshës së re, ai luan me qetësi dhe vetëbesim të admirueshëm. Megjithatë, forca e skuadrës spanjolle nuk mbështetet vetëm te talenti i tij, por edhe te organizimi kolektiv, lëvizjet pa top dhe stabiliteti në mbrojtje.
"Duhet të vazhdojmë të përmirësohemi, por nuk kemi frikë nga askush," deklaroi Yamal pas fitores 3-0 ndaj Austrisë.
Nga ana tjetër, Portugalia e siguroi kualifikimin me më shumë vështirësi. Ekipi hasi probleme në fazën e grupeve, ku e mbylli në vendin e dytë pas Kolumbisë, pas dy barazimeve, dhe më pas vuajti edhe ndaj Kroacisë për të arritur në fazën me eliminim direkt.
Cristiano Ronaldo mbetet ende figura qendrore e Portugalisë. Edhe pse nuk ka më shpërthimin fizik të viteve të kaluara, ai vazhdon të jetë vendimtar pranë portës kundërshtare. Pikërisht ai shënoi golin e barazimit 2-2 në finalen e Ligës së Kombeve, duke e çuar ndeshjen në kohën shtesë.
Kur Ronaldo nisi rrugëtimin drejt objektivit për të arritur 1.000 gola në karrierë, Lamine Yamal ishte ende foshnjë. Të hënën, dy breza të ndryshëm të futbollit do të përballen në një ndeshje ku vetëm njëri do të vazhdojë rrugëtimin.
Sipas deklaratave të motrës së Ronaldos, kjo Kupë Bote pritet të jetë turneu i tij i fundit me kombëtaren portugeze, çka do të thotë se çdo ndeshje mund të jetë e fundit për një nga futbollistët më të mëdhenj në histori.
Për Spanjën, kjo është një mundësi për hakmarrje sportive. Për Portugalinë, një tjetër rast për të eliminuar një prej favoritëve të turneut.
Lini një Përgjigje