FLASH
Shkruar nga Pamfleti
Vetë Berisha i drejtohej me një letër ambasadorit amerikan në atë kohë dhe akuzoi truprojën e tij Izet Haxhinë si të përfshirë. Por që atëherë, ai kurrë nuk doli para drejtësisë qoftë dhe si dëshmitar...
Nesër bëhen plot 26 vite nga vrasja e Azem Hajdarit, në atë kohë deputet i PD. Edhe sot e kësaj dite, kjo vrasje ka shumë mister brenda. Disa persona janë dënuar dhe ndodhen në qeli, por nuk dihet se kush e porositi vrasjen e tij dhe cila ishte arsyeja e vërtetë.
Ditën e vrasjes, Azem Hajdari ndodhej në qytetin e Fierit, ku dhe merrte pjesë në një miting të organizuar nga Partia Demokratike, më pas u ndal në Lushnje dhe pasdite mbërriti në Tiranë. Në mbrëmje ai njoftohet se dikush e priste poshtë, ku ishin Fatmir Haklaj dhe Jaho (Salihi) Mulosmani.
Kjo është dhe pjesa më e debatueshme, pasi ka shumë nga ata që thonë se këtu ka gisht ish-kryeministri Berisha, i cili dyshohet se e nxori në pritë përmes ish-truprojës së tij Izet Haxhisë, i cili është dënuar me 21-vite burg si pjesëmarrës në krim. Thuhet se dikush e telefonoi Hajdarin.
Pasi u informua, Azem Hajdari me dy truprojat e tij, Zenel Nezën dhe Besim Çerjan zbresin dhe i drejtohen makinës që ishte poshtë, duke trokitur në xham. Në këtë moment del nga mjeti Fatmir Haklaj dhe i afrohet me një kallashnikov në duar duke e qëlluar. Më pas, në të djathtë të tij supozohet të jetë afruar Jaho Mulosmani dhe në të majtë Naim Çangu, që të dy të armatosur. Në këto momente Besim Çerja, truproja i vendosur në anën e majtë të Azem Hajdarit bllokon armën e Fatmir Haklajt duke ia kapur fort me të dyja duart. Drejtimi i tytës së kësaj arme shihte në krahun ku gjendej Zenel Neza dhe Naim Çangu dhe nga e djathta në të majtë të Fatmir Haklajt, kur sheh se Fatmirit i bllokohet arma, Jaho Salihi afrohet dhe pretendohet se ka qëlluar me një pistoletë 9 mm në kokë shokun e tij Besim Çerjan.
Nga të shtënat vritet Azem Hajdari, ndërsa qëllohen Zenel Neza e Naim Çangu. Zenel Neza mbeti i plagosur dhe arriti të mbijetojë.
Manovrat e Berishës
Por kjo ngjarje ka shumë mistere. Vetë Berisha i drejtohej me një letër ambasadorit amerikan në atë kohë dhe akuzon truprojën e tij Izet Haxhinë si të përfshirë. Por që atëherë, ai kurrë nuk doli para drejtësisë qoftë dhe si dëshmitar. Kur u bë gjyqi për Jaho Mulosmanin dhe vëllezërit Haxhia, Berisha u thirr disa herë në gjykatë e prokurori si dëshmitar dhe kurrë nuk shkoi.
Së fundmi patëm gjyqin e Izet Haxhisë dhe prokuroria bashkë me avokatin e tij kërkuan që Berisha të thirret si dëshmitar, por gjyqtari e rrëzoi kërkesën. Ishte gjyqtari Lazër Sallaku, ai i cili i mbylli dhe dosjen e CEZ, që e la Berishën jashtë gjyqit. Pra në 26-vite, Berisha nuk ka dëshmuar për ekzekutimin e Hajdarit.
Zhdukja e provave
Shumë prova për vrasjen e Azem Hajdarit janë zhdukur. Prova më kryesore është një regjistrim i bërë ndaj Zenel Nezës. Pas atentatit, Zenel Neza mbeti i plagosur dhe shkoi në spital. Personi i parë që i shkoi në shtrat ishte Sali Berisha, i shoqëruar nga gazetari Ylli Rakipi. Ky i fundit kishte një diktofon në dorë dhe i marrin një dëshmi Zenel Nezës. Kjo dëshmi nuk u bë kurrë publike dhe kaseta u zhduk. Po ashtu Zenel Nezës ju dha pasaportë diplomatike dhe ai u largua jashtë vendit ku mori azil. Ai nuk dëshmoi kurrë qartë për ngjarjen.
Po ashtu një tjetër provë e zhdukur është ditari i ish-ministrit të Brendshëm, Perikli Teta. Në dosjen hetimore ndodhet një letër e Perikli Tetës, i cili tregon se gjatë hetimeve atij i është sekuestruar nga grupi hetimor një ditar, ku ai ka shkruar të gjitha ndodhitë për vrasjen e Hajdarit. Në atë ditar ka pasur të dhëna shumë interesante, ku flitej me emra konkretë. Por ai ditar nuk është më në dosjen e prokurorisë.
Kur nisi gjyqi i Haxhisë, kishte shpresa se do dilte Berisha para drejtësisë, por duket se me dënimin e tij, u vulos dhe mbyllja e kësaj dosje. Ndërkohë për herë të parë në 26 vite, nuk do e shohim nesër Berishën te busti i Hajdarit. Me shumë mundësi besnikët e tij do vënë lule dhe do e kujtojnë, por Berisha ndodhet në arrest shtëpie dhe me gjasë reagimi i vetëm do të jetë një status në rrjetet sociale. /Pamfleti
Lini një Përgjigje