FLASH
Shkruar nga Pamfleti
Kryeqyteti i Ukrainës u godit në orët e para të mëngjesit nga një valë sulmesh ruse me raketa dhe dronë, duke lënë të paktën 10 persona të vdekur dhe dhjetëra të plagosur, sipas autoriteteve ukrainase.
Sulmi shkaktoi dëme të konsiderueshme në disa zona të Kievit, ku u raportuan zjarre, ndërtesa të dëmtuara dhe shembje objektesh. Sipas komandantit ushtarak të rajonit të Kievit, Mykola Kalashnik, forcat ruse përdorën dronë sulmues, raketa balistike dhe raketa lundrimi.
"Gjatë natës, armiku nisi një sulm të ri masiv në rajonin e Kievit duke përdorur dronë sulmi, raketa balistike dhe raketa lundrimi", deklaroi Kalashnik në një postim në Telegram.
Pak orë para sulmit, presidenti ukrainas Volodymyr Zelensky kishte paralajmëruar se Rusia po përgatiste një ofensivë të re në shkallë të gjerë. Nga Dublini, ku ndodhej për një vizitë zyrtare, ai njoftoi se do të kthehej menjëherë në Kiev pas informacioneve të marra nga shërbimet përkatëse.
"Ne e dimë që Putin ka kohë që po përgatit këtë goditje masive kundër Ukrainës", u shpreh Zelensky, duke u bërë thirrje qytetarëve të "dyfishojnë vigjilencën" dhe të "mbrojnë veten".
Sipas gazetarëve të AFP-së në terren, shpërthime të forta u dëgjuan për disa orë me radhë, ndërsa kolona tymi u ngritën mbi qendrën e kryeqytetit. Në disa zona shpërthimet u pasuan nga zjarre të mëdha, ndërsa ekipet e zjarrfikësve dhe ambulancat ndërhynë menjëherë.
Në rrugët e Kievit, banorët u panë duke u drejtuar drejt strehimoreve antiajrore, disa prej tyre duke mbajtur edhe dyshekë për t'u strehuar gjatë alarmit.
Edhe kryebashkiaku i Kievit, Vitali Klitschko, konfirmoi dëmet e shkaktuara nga sulmi, duke bërë të ditur se një shpërthim goditi një ndërtesë ku ndodhet një shërbim ambulancash.
"Pesë paramedikë u plagosën në lagjen Shevchenkivskyi, njëri prej tyre është në gjendje kritike", deklaroi Klitschko.
Ai shtoi se në një lagje tjetër çatia e një pallati shumëkatësh u përfshi nga flakët, ndërsa një ndërtesë nëntëkatëshe u shemb pjesërisht, duke lënë banorë të bllokuar nën rrënoja.
Autoritetet ukrainase vijojnë operacionet e kërkim-shpëtimit, ndërsa bilanci i viktimave pritet të përditësohet.
Lini një Përgjigje