FLASH
Shkruar nga Pamfleti
Këtë fundjavë u zhvilluan ndeshjet e radhës në FA Cup, kompeticionin më të vjetër në Angli dhe në botë, duke prodhuar rezultate të pritshme, por edhe surpriza të papritura.
Mançester Siti siguroi kalimin në raundin tjetër pas fitores 2-0 ndaj Salfordit, skuadër e Kategorisë së Tretë angleze. “Qytetarët” e zgjidhën ndeshjen që në pjesën e parë, falë një autogoli në minutën e 6-të dhe golit të Mark Guehi, i cili realizoi golin e tij të parë me fanelën e Sitit.
Me këtë sukses, skuadra e Pep Guardiolës vijon rrugëtimin në këtë edicion të FA Cup, duke shmangur çdo surprizë përballë një kundërshtari nga një kategori më e ulët.
Ndryshe nga Siti, Bërnli u përball me një surprizë të hidhur në fushën e vet, duke u mposhtur 1-2 nga Mansfilld Taun. Vendasit kaluan të parët në avantazh dhe e mbyllën pjesën e parë në epërsi, por në fraksionin e dytë miqtë përmbysën rezultatin me dy gola, duke siguruar kualifikimin.
Në këtë takim nuk ishte i grumbulluar sulmuesi shqiptar Armando Broja.
Në ndeshjet e tjera, Noruiçi triumfoi 3-1 ndaj VBA-së, ndërsa Sauthemptoni siguroi kualifikimin pas kohës shtesë. Takimi ndaj Leiçesterit u mbyll 1-1 në kohën e rregullt, ndërsa në shtesë Sauthemptoni shënoi golin vendimtar për rezultatin përfundimtar 2-1.
Ndeshjet e kësaj faze konfirmuan edhe një herë karakterin konkurrues të FA Cup, ku skuadrat e kategorive më të ulëta shpesh arrijnë të befasojnë rivalët më të fortë.
Lini një Përgjigje