Shkruar nga Pamfleti
Propozimi i kryeministrit Edi Rama për të emëruar Vlora Hysenin në krye të SHISH ka sjellë reagime të shumta politike. Ajo ka qenë më herët zv/drejtoreshë e Shërbimit Inteligjent në Kosovë dhe sot Rama ja propozoi Begajt që të marrë frerët e inteligjencës shqiptare.
Sipas deputetit Kreshnik Çollaku, emërimi i saj është një provokim për autoritetet e Kosovës. Sipas tij, duhet të hetohet se përse ajo është shkarkuar, ndërsa kërkon nga Begaj që të mos lejojë një kurs përplasjeje me Prishtinën.
Nga mediat mësova se kryeministri Rama ka propozuar presidentit Begaj znj. Vlora Hyseni, si kandidate për kreun e SHISH.
Është hera e parë që e dëgjoj emrin e znj. Hyseni dhe nuk kam asnjë njohje për cilësinë dhe aftësinë e saj në krye të kësaj detyre.
Çfarë më bën përshtypje është fakti se znj. Hyseni ka mbajtur për një periudhe kohe pozicionin e nën drejtores se AKI (Shërbimit Inteligjent të Kosovës) dhe është shkarkuar nga aty nga Presidentja Vjosa Osmani dhe kryeministri Albin Kurti.
Nuk njoh asnjë nga arsyet e këtij shkarkimi, por më duket e pazakontë që një zyrtar të shkarkuar nga institucionet e Kosovës (në fushën e inteligjencës) të emërohet po në këtë fushë nga Shqipëria.
Marrëdhëniet midis Shqipërisë e Kosovës janë vëllazërore e duhet të shkojnë drejt funksionimit të përbashkët.
Ky rast me duket një provokim i panevojshëm nga Shqipëria karshi institucioneve të Kosovës. Është jashtë çdo arsyeje që kjo të ndodhë.
Midis institucioneve të dy vendeve tona duhet sa më shumë bashkëpunim e bashkërendim, ndërsa gjeste të tilla stimulojnë konflikt të panevojshëm dhe të dëmshëm.
Unë nuk e kuptoj këtë sjellje të kryeminsitrit, por mbetem me shpresë se Presidenti Begaj nuk do të lejojë krijimin e një klime të panevojshme e të dëmshme provokimi, mosbesimi e mosbashkëpunimi midis institucioneve të Republikës së Kosovës dhe të Republikës së Shqipërisë.
