FLASH
Shkruar nga Pamfleti
Projektligji që ka sjellë qeveria për rritjen e pagave të anëtarëve dhe kryetarit të Gjykatës Kushtetuese i çon rrogat e tyre nga 6.4 milionë lekë dhe 7.5 milionë lekë në muaj.
Deputeti demokrat, Oerd Bylykbashi u shpreh kundër rritjes së pagave të gjyqtarëve të Kushtetueses, duke shtuar se pensionet në Shqipëri janë të turpshme.
Bylykbashi u shpreh se argumenti i qeverisë është që me rritjen e pagave Gjykata Kushtetuese bëhet më e pavarur, por sipas tij kjo është më shumë një çështje dinjiteti.
Bylykbashi tha më tej se në Shqipëri kemi pension minimal, për disa persona e kemi 78 mijë lekë të vjetra, ndërsa shton se minimumi jetik sot është afro 200 mijë lekë të vjetra.
“Të gjithë ju jeni ndeshur në fushatë elektorale kur keni takuar qytetarët. Keni takuar njerëz, pensionistë… Personalisht më ka ndodhur, kur takova dikë që ankohej për pensionin 150 mijë të vjetra. Ishte një tjetër ngjitur. 150 tha, unë e kam 75 mijë lekë të vjetra. Pra ai ishte gjysmë e atij tjetri. Ne kemi pension minimal, për disa persona e kemi 78 mijë lekë të vjetra. Ky është një turp. Bëni një llogari të thjeshtë sa rrinë këta qytetarë që me atë pension t’u rrijë me dinjitet termi qytetar.
Këta marrin diçka që nuk ka lidhje me dinjitetin e tyre njerëzor, si individ. Kjo republikë angazhohet për dinjitetin e njerëzve të vet. E dimë shumë mirë që minimumi jetik sot është afro 200 mijë lekë të vjetra”, tha Bylykbashi.
Deputeti demokrat tha se opozita ka propozuar një nismë ligjore për minimumin jetik, 200 mijë Lekë, por mazhoranca e refuzon.
“Pse nuk bëjmë përpjekje që dinjitetin e këtyre (pensionistëve) ta ngremë sipër nëse ua ngremë nëpunësve të lartë”, tha Bylykbashi duke marrë si shembull rritjen që propozohet t’u bëhet pagave të gjyqtarëve në Gjykatën Kushtetuese.
Lini një Përgjigje