FLASH
Shkruar nga Pamfleti
Giorgia Meloni nuk mori pjesë në samitin BE–Ballkani Perëndimor të zhvilluar sot në Tivat të Malit të Zi...
Kryeministrja italiane pritej të merrte pjesë në sesionin e krerëve të shteteve dhe qeverive, por anulimi i pjesëmarrjes së saj erdhi në momentin e fundit. Meloni ndodhej në Reggio Calabria për ceremoninë e 212-vjetorit të themelimit të Armatës së Karabinierëve dhe, sipas raportimeve, një nga arsyet mund të ketë qenë edhe një vizitë e paparashikuar për prezantimin e një pulle postare përkujtimore.
Pse Meloni mungoi në samitin e Tivatit?
Sipas Corriere della Sera, kryeministrja u largua nga Kalabria në orët e para të pasdites, por avioni qeveritar u drejtua për në Romë dhe jo për në Mal të Zi. Më pas, Meloni informoi personalisht presidentin e Malit të Zi, Jakov Milatoviç, dhe presidentin e Këshillit Evropian, Antonio Costa, duke shprehur keqardhje që nuk mundi të mbërrinte në kohë për takimin.
Zyrtarisht, mungesa u justifikua me zgjatjen e ceremonisë në Lungomare Falcomata të Reggio Calabrias, e cila nisi me vonesë dhe përfundoi rreth orës 13:00. Në aktivitet ishin të pranishëm edhe komandanti i ri i përgjithshëm i Karabinierëve, Salvatore Luongo, ministri i Mbrojtjes Guido Crosetto dhe shefi i Shtabit të Përgjithshëm të Mbrojtjes, gjenerali Luciano Portolano.
Megjithatë, pas ceremonisë, Meloni mori pjesë edhe në prezantimin e një pulle postare përkujtimore në Prefekturë, një aktivitet që nuk figuronte në axhendën publike të publikuar në faqen e Kryeministrisë italiane. Në njoftimin zyrtar thuhet:
"Pas përfundimit të festimeve për 212-vjetorin e themelimit të Armatës së Karabinierëve, kryeministrja u drejtua në Prefekturën e Reggio Calabrias për anulimin filatelik të një pulle postare përkujtimore kushtuar përvjetorit. Kjo vizitë nuk ishte pjesë e programit fillestar të publikuar nga Palazzo Chigi."
Çfarë u diskutua në samitin e Tivatit?
Liderët e Bashkimit Evropian dhe përfaqësuesit e gjashtë vendeve partnere të Ballkanit Perëndimor, Shqipërisë, Bosnjë-Hercegovinës, Kosovës, Maqedonisë së Veriut, Malit të Zi dhe Serbisë, u mblodhën në Tivat, gjashtë muaj pas samitit të mëparshëm në Bruksel, për të riafirmuar perspektivën e anëtarësimit të vendeve të rajonit në BE.
Mali i Zi, vendi mikpritës, konsiderohet kandidati më i avancuar për anëtarësim dhe synon të bëhet pjesë e Bashkimit Evropian deri në vitin 2028, një objektiv ambicioz dhe jo i garantuar. Shqipëria dhe Mali i Zi konsiderohen dy proceset më të avancuara, ndërsa situata mbetet më komplekse për Serbinë, Bosnjë-Hercegovinën, Kosovën dhe Maqedoninë e Veriut për shkak të reformave të brendshme, tensioneve dypalëshe, çështjeve institucionale dhe niveleve të ndryshme të harmonizimit me politikën e jashtme të BE-së.
Në Tivat pritej të merrnin pjesë, ndër të tjerë, presidenti francez Emmanuel Macron, kancelari gjerman Friedrich Merz dhe presidentja e Komisionit Evropian Ursula von der Leyen. Giorgia Meloni nuk ishte e pranishme.
Bonelli: Meloni si te filmi ‘mami, humba avionin’”
Për Angelo Bonelli, deputet i Aleancës së Gjelbër dhe të Majtës (AVS) dhe bashkëzëdhënës i Europa Verde, mungesa e Melonit nga samiti evropian kujton filmin e njohur “Mami, humba avionin”.
"Nuk është vetëm titulli i një filmi të famshëm të Krishtlindjeve; duket se po bëhet edhe axhenda e politikës së jashtme të kryeministres Meloni. Nuk është një gafë protokollare, por një fakt politik. Meloni flet çdo ditë për patriotizëm, por kur mblidhen tryezat ku vendosen ekuilibrat evropianë dhe roli i Italisë, qeveria mungon. Kjo është e djathta sovraniste: shumë propagandë dhe pak prani aty ku mbrohen realisht interesat kombëtare", deklaroi Bonelli.
Piero De Luca, kryetar i grupit të Partisë Demokratike në Komisionin për Çështjet Evropiane të Dhomës së Deputetëve, pyeti:
"Bëhet fjalë për një problem axhende dhe një incident diplomatik apo për një largim të qëllimshëm nga samiti si zgjedhje politike? Dyshimi është i bazuar. Meloni drejton një shumicë të përçarë në politikën e jashtme: Salvini vazhdon t’i afrohet Moskës, Tajani kërkon mbështetje atlantike, ndërsa Meloni lëkundet mes sovranizmit dhe ambiguitetit të leverdishëm. Të paraqiteshe në një tryezë ku diskutohet mbështetja për Ukrainën, zgjerimi i BE-së dhe një front i përbashkët me Parisin dhe Berlinin do të thoshte të zgjidhje një qëndrim. Dhe për këtë shumicë, zgjedhja është e rrezikshme."
Edhe senatori Enrico Borghi, nënkryetar i Italia Viva, kritikoi ashpër mungesën e kryeministres:
"Ne prezantojmë pulla postare, të tjerët marrin vendime. Meloni e bojkoton në minutën e fundit samitin e Tivatit dhe Italia po bëhet gjithnjë e më e izoluar dhe e parëndësishme. Ndërsa liderët evropianë merren me të ardhmen e Bashkimit Evropian dhe luftën në Ukrainë, kryeministrja jonë vonohet në Reggio Calabria. Tashmë ishte e sikletshme të mbërrije në samit në momentin e fundit, kur ai kishte nisur që dje. Të mos paraqitesh fare tregon mungesë të plotë vizioni. Pas mungesës në takimin për Rusinë dhe Ukrainën, sot kemi edhe këtë rast. Në fundjavë do të zhvillohet një takim mes liderëve të Mbretërisë së Bashkuar, Francës dhe Gjermanisë – Keir Starmer, Emmanuel Macron dhe Friedrich Merz – me Volodymyr Zelenskyn. Dhe Giorgia Meloni? Bloomberg, që e publikoi lajmin, as nuk e përmend. A po përgatitet një tjetër figurë e keqe?" tha Borghi. /Përshtati Pamfleti/
Si ka mundesi qe merreni me ca buce sygurdulluara? Femra sy gurdulluar i ka mendte vetem te palloshi. Politika eshte bere zeje e njerezve me te pa skrupullt. Me falni qe poshterova fjalen zeje. Zeja (zanati, trade) eshte me i respektuari e kerkuari ne bote. Me e bukura ose e poshtra eshte se te bukuren e lakmojne me te ndyret dhe e felliqin. Italia eshte bukuria, stili, eleganca, finesa dinjitoza, parfumoza, qe nuk mund ta pranojne ne gjirin e vet ligavecin kermill. Dhe poshtersia me e ulet kur kaqoli jone iu perul sikur te ishte mbreteresha Donika e mbretit Gjergj Kastrioti.