FLASH
Shkruar nga Pamfleti
UEFA ka publikuar renditjen e përditësuar të koeficientëve për këtë sezon, ku Anglia vijon të kryesojë bindshëm. Sukseset e klubeve angleze në kompeticionet europiane kanë konsoliduar vendin e parë dhe i kanë siguruar Premier Ligës një vend shtesë në edicionin e ardhshëm të Champions League.
Anglia kryeson me 22.291 pikë dhe është federata e vetme që ka kualifikuar të 9 skuadrat pjesëmarrëse në fazën e 1/8-ave të finaleve në garat europiane.
Italia ka bërë një hap të rëndësishëm përpara në renditje falë kualifikimit të Bolonjës dhe Fiorentinës në Ligën e Europës dhe në Ligën e Konferencës. Me katër skuadra të kualifikuara në 1/8-at e finaleve, Seria A ka reduktuar ndjeshëm diferencën me vendin e dytë që mbahet nga Gjermania.
Nga një diferencë prej -571 pikësh, Italia është afruar në -214 pikë ndaj gjermanëve, duke e mbajtur të hapur garën për vendin e dytë në renditjen sezonale.
Gjermania renditet e dyta, me 5 skuadra të kualifikuara nga 7 gjithsej, ndërsa Spanja mban vendin e tretë me 4 skuadra të kualifikuara nga 7, po aq sa Italia.
Fati i renditjes përfundimtare pritet të vendoset në turin e ardhshëm, ku përballjet direkte mes skuadrave të këtyre vendeve mund të ndikojnë ndjeshëm në grumbullimin e pikëve.
Italia synon të përfitojë një vend shtesë në Champions League për sezonin e ardhshëm, objektiv që varet nga rezultatet në fazat në vijim të kompeticioneve europiane. Çdo fitore apo kualifikim i mëtejshëm do të ketë peshë të drejtpërdrejtë në renditjen e UEFA-s dhe në shpërndarjen e vendeve për edicionin e ardhshëm.
Lini një Përgjigje