FLASH
Shkruar nga Pamfleti
Kombëtarja e Irakut mund të detyrohet të ndërmarrë një udhëtim të gjatë dhe të vështirë me autobus drejt kufirit me Jordaninë, për të vazhduar më pas rrugën drejt Meksikës, ku është planifikuar të luajë ndeshjen e “play-off”-it ndërkontinental për kualifikimin në Kupën e Botës 2026.
Situata është krijuar pasi hapësira ajrore e Irakut është mbyllur për arsye sigurie, në mes të tensioneve dhe konfliktit të vazhdueshëm mes Iranit dhe Shteteve të Bashkuara. Si pasojë, një pjesë e futbollistëve të kombëtares irakiane kanë mbetur të bllokuar në Bagdad dhe aktualisht nuk kanë mundësi të udhëtojnë me avion.
Për të arritur në një aeroport ndërkombëtar dhe për të vazhduar udhëtimin drejt Meksikës, lojtarët mund të detyrohen të udhëtojnë fillimisht me autobus deri në kufirin me Jordaninë. Ky udhëtim pritet të zgjasë rreth 12 orë dhe kalon në zona që konsiderohen të ndikuara nga tensionet rajonale.
Trajneri australian i Irakut, Graham Arnold, ka kërkuar më herët shtyrjen e ndeshjes vendimtare të “play-off”-it, duke argumentuar se skuadra e tij aktualisht nuk ka mundësi të sigurojë udhëtimin drejt vendit ku do të zhvillohet sfida. Deri tani, FIFA nuk ka konfirmuar ndonjë vendim për shtyrjen e ndeshjes.
Iraku siguroi të drejtën për të luajtur në këtë fazë pasi mposhti Emiratet e Bashkuara Arabe. Në “play-off”-in ndërkontinental pritet të përballet me fituesin e çiftit mes Bolivisë dhe Surinamit për një vend në Kupën e Botës 2026.
Ndërkohë, Federata e Futbollit të Irakut po shqyrton edhe një plan alternativ: grumbullimin e një pjese të skuadrës jashtë vendit, duke përdorur lojtarët që aktivizohen në klube europiane apo në liga të tjera ndërkombëtare. Megjithatë, kjo zgjidhje mbetet e ndërlikuar, pasi disa nga futbollistët kryesorë dhe pjesëtarë të stafit teknik ndodhen ende në Irak dhe duhet të gjejnë një mënyrë të sigurt për të dalë nga vendi.
Lini një Përgjigje