FLASH
Shkruar nga Pamfleti
Tre vite më parë, Kristiano Ronaldo tronditi botën e sportit duke firmosur për Al-Nassr. Gjashtë muaj më vonë, Superliga Saudite u pasurua me emra të tjerë të mëdhenj si Karim Benzema, Nejmar, Roberto Firmino, Sadio Mane dhe Ajmerik Laporte. Edhe pse disa prej tyre ishin në fund të karrierës, fakti që pranuan të luanin në Lindjen e Mesme u konsiderua një sinjal i fortë ndryshimi në futbollin botëror.
Pagat e ofruara u cilësuan “ndryshuese jete”, duke bindur edhe futbollistë që më parë kishin mbajtur qendrime parimore. Arabia Saudite u pa si një “përçarëse” e rendit tradicional të tregut të transferimeve, duke sfiduar dominimin evropian përmes fuqisë së saj financiare.
Sot, megjithatë, kriza nuk vjen nga jashtë, por nga brenda vetë kampionatit.
Ronaldo, fytyra e projektit saudit
Që nga dita e parë, Kristiano Ronaldo është shndërruar në ambasadorin de facto të projektit sportiv saudit. Pas rinovimit të kontratës me Al-Nassr verën e kaluar, ai e cilësoi ligën si konkurruese dhe theksoi besimin e tij afatgjatë në projektin që kulmon me Kupën e Botës 2034 në Arabinë Saudite.
Kontributi i tij në imazh dhe marketing është i paçmueshëm. Por tashmë duket se ylli portugez nuk është më i gatshëm të “luajë lojën”, edhe në kuptimin literal.
Pa titull kampioni, pavarësisht golave
Megjithëse ka shënuar 91 gola në 95 ndeshje dhe iu bashkua Al-Nassr kur skuadra kryesonte tabelën, Ronaldo ende nuk ka fituar titull kampioni. Ky sezon dukej vendimtar, sidomos pas ardhjes së trajnerit Horge Zhesus dhe përforcimeve si Zhoao Feliks dhe Kingsli Kuman.
Fillimi ishte perfekt, me 10 fitore radhazi, por forma e skuadrës ra në fillim të vitit 2026, duke humbur avantazhin ndaj Al-Hilal.
Pakënaqësi dhe merkato e dobët
Në janar, Al-Nassr pësoi tre humbje brenda 10 ditësh. Trajneri Zhesus kërkoi përforcime, por pranoi se klubi përballej me kufizime buxhetore. Edhe pse u afruan dy lojtarë në ditët e fundit të merkatos, ata nuk përmbushën pritshmëritë e Ronaldos, sidomos në krahasim me lëvizjet e rivalëve.
Ndërkohë, Al-Hilal realizoi një goditje të madhe duke transferuar Karim Benzema nga Al-Itihad.
Benzema dhe akuzat për konflikt interesi
Kalimi i Benzemas te Al-Hilal u shoqërua me polemika. Sulmuesi francez kishte ende kontratë me Al-Itihad dhe ishte i gatshëm të rinovonte, por u pakënaq me kushtet financiare të propozuara. Pas tensioneve, ai u largua si lojtar i lirë.
Fakti që Al-Itihad, Al-Hilal, Al-Nassr dhe Al-Ahli janë të gjitha në pronësi të Fondit Sovran saudit (PIF) ka nxitur debate mbi konfliktin e interesit dhe favorizimet e mundshme mes klubeve që garojnë në të njëjtin kampionat.
Ronaldo në grevë
Sipas raportimeve, transferimi i Benzemas te rivalët shkaktoi zemërim te Ronaldo, i cili refuzoi të luante në ndeshjen kundër Al-Rijad. Një veprim që dëmton jo vetëm imazhin e tij, por edhe vetë ligën.
Ironikisht, Al-Nassr fitoi pa të, duke u afruar vetëm një pikë nga kryesuesit, por vëmendja u përqendrua te mungesa e yllit portugez dhe pasojat e saj.
Një garë titulli nën hije
Ronaldo mbetet figura kyçe e projektit saudit, edhe në moshën 40-vjeçare. Megjithatë, tensionet aktuale rrezikojnë të errësojnë një garë titulli mjaft interesante mes tre skuadrave kryesore.
Pyetja kryesore tani është nëse Ronaldo do të rikthehet në fushë në përballjen e ardhshme me Al-Itihad, një ndeshje e ndezur nga pakënaqësitë e tifozëve pas transferimit të Benzemas.
Ajo që është e qartë, është se Superliga Saudite, e cila synonte të trondiste futbollin botëror, po përballet tani me kaos të brendshëm të shkaktuar nga vetë yjet e saj më të mëdhenj.
Lini një Përgjigje