FLASH
Shkruar nga Pamfleti
Dy nga sulmuesit më emocionues në botë, Vinicius Jr. dhe Erling Haaland, do të jenë në qendër të vëmendjes të dielën në mbrëmje në New Jersey, kur Brazili do të përballet me Norvegjinë në një ndeshje të rëndësishme të raundit të 1/16-ve.
Pavarësisht dominimit të tij në futbollin botëror, Brazili historikisht ka hasur vështirësi ndaj Norvegjisë. Pas katër përballjeve pa fitore, "Seleçao" shpreson që hera e pestë të sjellë më në fund suksesin.
Skuadra e Carlo Ancelottit ka treguar cilësi, por edhe dobësi. Pasi i shpëtoi me vështirësi eliminimit ndaj Japonisë, duke fituar 2-1 pas kohës shtesë në 1/16 e finales, Brazili ka nevojë për një paraqitje më bindëse ndaj Norvegjisë, një prej "kuajve të errët" të këtij turneu.
E udhëhequr nga Erling Haaland dhe Martin Ødegaard, Norvegjia vjen me besim të lartë. Ajo është një nga vetëm tre kombëtaret ndaj të cilave Brazili nuk ka arritur të regjistrojë asnjë fitore në Kupën e Botës.
Si arritën Brazili dhe Norvegjia në 1/16 e finales?
Brazili e mbylli Grupin C në vendin e parë, pas fitoreve ndaj Skocisë dhe Haitit, si edhe barazimit me Marokun. Në 1/16 e finales, ai përmbysi Japoninë me rezultatin 2-1 pas kohës shtesë.
Norvegjia u rendit e dyta në Grupin I, duke fituar ndaj Irakut dhe Senegalit, ndërsa u mposht nga Franca. Në 1/16 e finales siguroi një fitore 2-1 ndaj Bregut të Fildishtë në minutat e fundit, duke regjistruar suksesin e parë në historinë e saj në një ndeshje me eliminim direkt në Kupën e Botës, pas eliminimeve të mëparshme nga Italia në vitet 1938 dhe 1998.
A mund ta zgjasë Haaland ëndrrën e Norvegjisë?
Qoftë me klubin apo me kombëtaren, ndikimi i Erling Haaland mbetet vendimtar. Nga 10 golat që Norvegjia ka shënuar në këtë turne, pesë mbajnë firmën e sulmuesit 25-vjeçar, një statistikë mbresëlënëse për debutimin e tij në Kupën e Botës.
Sonte, Norvegjia do të ketë nevojë që sulmuesi i saj, 1.95 metra i gjatë, të bëjë sërish diferencën nëse synon të arrijë për herë të parë në çerekfinale.
Norvegjezët mund të frymëzohen nga skuadra e vitit 1998, e cila mposhti Brazilin 2-1 në fazën e grupeve të Kupës së Botës. Për më tepër, trajneri Ståle Solbakken ishte pjesë e asaj kombëtare si mesfushor.
"Brazili është favorit, sigurisht, por shpresojmë t'i vendosim në vështirësi. Nuk zbresim në fushë për ta shijuar ndeshjen, por për ta fituar dhe për të arritur në çerekfinale. Është e mundur, edhe pse shumë e vështirë", deklaroi Solbakken.
Nga ana tjetër, Norvegjia do t'i kushtojë vëmendje të veçantë Vinicius Jr., i cili me katër gola është golashënuesi më i mirë dhe lojtari më i rëndësishëm i Brazilit në këtë turne. Ai u bë braziliani i parë që nga Ronaldo dhe Rivaldo në vitin 2002 që shënon në të tre ndeshjet e fazës së grupeve të një Kupe Bote. Pikërisht ai vit ishte hera e fundit kur Brazili ngriti trofeun.
Parashikimi i ndeshjes
Sipas superkompjuterit të Opta-s, Brazili ka 53.6 për qind shanse për të fituar brenda kohës së rregullt, ndërsa Norvegjisë i jepen 22.4 për qind.
Modeli parashikon gjithashtu një probabilitet prej 24 për qind që ndeshja të shkojë në kohë shtesë.
Me kë përballet fituesi?
Fituesi i sfidës Brazil–Norvegji do të luajë në çerekfinale ndaj fituesit të përballjes Meksikë–Angli, në Miami, të shtunën, më 11 korrik.
Historiku i takimeve
Norvegjia gëzon një rekord të rrallë ndaj Brazilit, pasi nuk është mposhtur asnjëherë në katër përballjet mes tyre, duke regjistruar dy fitore dhe dy barazime. Mes tyre spikat fitorja 2-1 në fazën e grupeve të Kupës së Botës 1998.
Takimi i fundit mes dy kombëtareve u zhvillua në vitin 2006 në një ndeshje miqësore, e cila përfundoi në barazim 1-1.
Një tjetër statistikë që shqetëson Carlo Ancelottin është fakti se Brazili është eliminuar në secilën prej gjashtë ndeshjeve të fundit me eliminim direkt në Kupën e Botës ndaj kundërshtarëve evropianë, që nga fitorja ndaj Gjermanisë në finalen e vitit 2002.
Formacionet e mundshme
Brazili (4-3-3): Alisson; Danilo, Marquinhos, Gabriel, Santos; Guimaraes, Casemiro, Martinelli; Rayan, Cunha, Vinicius. Norvegjia (4-3-3): Nyland; Pedersen, Ajer, Heggem, Moller Wolfe; Odegaard, Berge, Berg; Sorloth, Haaland, Nusa.
Lini një Përgjigje